Türkiyə ordusu son bir həftədə 59 terrorçunu zərərsizləşdirib
İstanbul, 23 noyabr, AZƏRTAC
Türkiyə ordusu PKK/KCK-PYD/YPG, FETÖ və İŞİD də daxil olmaqla, ölkə üçün təhdid və təhlükə mənbəyi olan terror qruplaşmaları ilə mübarizəni qətiyyətlə davam etdirir. Son bir həftə ərzində ölkə daxilində və sərhədyanı bölgələrdə icra edilən əməliyyatlarda 59 terrorçu zərərsizləşdirilib.
AZƏRTAC xəbər verir ki, bunu Türkiyə Silahlı Qüvvələrinin mətbuat müşaviri Zeki Aktürk mətbuat konfransında deyib. Onun sözlərinə görə, yanvarın 1-dən indiyədək zərərsizləşdirilən terrorçu sayı 1927-yə çatıb. Bununla da 2015-ci il iyulun 24-də başladılan antiterror əməliyyatlarının gedişində ümumilikdə 39 270 terrorçu sıradan çıxarılıb.
Əməliyyatlarda, həmçinin terrorçulara aid çoxlu sayda sığınacaq və silah-sursat aşkarlanıb.
Zeki Aktürk qeyd edib ki, son bir həftədə Türkiyə sərhədlərini qanunsuz yollarla keçən 390 nəfər saxlanılıb. Bu müddət ərzində sərhədləri keçməyə cəhd göstərən 2949 nəfərin qarşısı alınıb. Beləliklə, il ərzində ölkə sərhədlərini qeyri-leqal yollarla keçmək istəyənlərin sayı 12 467 nəfərə çatıb.
Bölmənin digər xəbərləri
