Türkiyə Prezidenti Ankaranın Suriya ilə bağlı baxışını NATO-nun Baş katibinə izah edib
Ankara, 10 dekabr, AZƏRTAC
Türkiyə Prezidenti Rəcəb Tayyib Ərdoğan NATO-nun Baş katibi Mark Rütte ilə telefon danışığında Suriyadakı son hadisələri müzakirə edib.
AZƏRTAC Türkiyə Prezidenti Administrasiyasının Kommunikasiya İdarəsinə istinadla xəbər verir ki, Türkiyə lideri Şimali Atlantika Alyansının Baş katibinə rəsmi Ankaranın Suriya münaqişəsinin başladığı ilk gündən bu qonşu ölkənin ərazi bütövlüyünü və sabitliyini dəstəklədiyini bildirib.
“Suriya dövləti Suriya xalqı tərəfindən idarə olunmalıdır”, - deyən Ərdoğan Ankaranın “terrorçulardan təmizlənmiş vahid Suriyanın qurulmasına” mümkün olan bütün töhfələrini verməyə davam edəcəyini vurğulayıb.
Bu arada Türkiyənin daxili işlər naziri Ali Yerlikaya suriyalı qaçqınların vətənə “təhlükəsizlik və layiqli” şəkildə qayıtması məsələsi ilə bağlı suriyalı qeyri-hökumət təşkilatları ilə danışıqlara başlanıldığını açıqlayıb.
Eyni zamanda, Türkiyənin energetika və təbii sərvətlər naziri Alparslan Bayraktar “qonşu ölkədə təhlükəsizlik təmin olunarsa” Qətərdən Avropa ölkələrinə qaz kəmərinin Suriya ərazisindən keçə biləcəyini istisna etməyib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
