Türkiyə Prezidenti: Dezinformasiya ilə mübarizə milli təhlükəsizlik məsələsidir
Ankara, 28 iyul, AZƏRTAC
Dezinformasiyanın bütün formaları ilə mübarizə milli təhlükəsizlik, demokratiyanın qorunması və sosial hüzur məsələsidir. Müasir dünyada dezinformasiya yalanların yayılmasından kənara çıxaraq cəmiyyətdə birliyi və etimadı zəiflədən asimmetrik bir təhlükə elementinə çevrilib. Bu problemlə mübarizə ölkə üçün həyati əhəmiyyət kəsb edir.
AZƏRTAC xəbər verir ki, bu açıqlamanı Türkiyə Prezidenti Rəcəb Tayyib Ərdoğan Ankarada keçirilən İkinci Kommunikasiya Şurasında çıxış edərkən verib.
“Türkiyə yüzilliyi – kommunikasiya əsri” adlı tədbirdə çıxış edən Türkiyə lideri yeni media vasitələrinin və rəqəmsal platformaların informasiya istehsalını və yayılmasını əhəmiyyətli dərəcədə sürətləndirdiyini qeyd edib. “Əvvəllər saatlarla, günlərlə və hətta həftələrlə davam edən işlər indi tək bir kompüter əmri ilə dəqiqələrlə yerinə yetirilə bilər. Bu proses süni intellekt modellərinin inteqrasiyası sayəsində xüsusilə sürətlənib”, - deyə Türkiyə Prezidenti bildirib.
Dövlət başçısı qeyd edib ki, bu gün informasiya texnologiyaları düşüncə tərzimizə, hadisələrə və proseslərə yanaşmağımıza təsir göstərir. “Məsələn, sosial media platformaları bir çox hallarda müəyyən bir mövzuya nə qədər diqqət ayırdığımızı, məsələlərə necə yanaşdığımızı və çox vaxt necə reaksiya verdiyimizi müəyyən edir. İnsanlar təkcə indiki vaxtın deyil, həm də keçmişin təhrif olunmuş qavrayışları təhlükəsi ilə üzləşirlər. Ruhsuz, səthi bir kimlik yaranır", - deyə Prezident Ərdoğan sözlərinə davam edib.
O, yeni informasiya mühitinin psixoloji və sosial nəticələri ilə həm fərdlərə, həm də bütövlükdə cəmiyyətə təsir etdiyini, dəyərləri və mədəniyyəti aşındırmaq riski yaratdığını qeyd edib. “Faktlar və qavrayışlar arasındakı boşluq genişlənir. Kütlələr sözdə “alqoritmik faşizm”in məngənəsindədir. Şübhəsiz ki, həqiqət bundan ən çox zərər çəkir”, - deyən Türkiyə lideri, həmçinin dezinformasiya və manipulyasiya ilə dolu müasir kommunikasiya mühitinin informasiyaya yeni bir sima verdiyini diqqətə çatdırıb.
Siyasətçi vurğulayıb: “Ölkədə gərginlikdən, qütbləşmədən, qorxu və narahatlığın yayılmasından mənfəət əldə etməyə çalışanlara öz resurslarını dövlətə qarşı silah kimi istifadə etməyə imkan verməyəcəyik”.
O qeyd edib ki, dəyişən dünyada Türkiyənin kommunikasiya ekosistemi üçün yeni kurs müəyyənləşdirməyə yönəlmiş hərtərəfli müzakirələrə ehtiyac çoxdan yaranıb.
Türkiyə liderinin sözlərinə görə, bu gün müasir kommunikasiya trendlərinin ictimai diplomatiyaya təsirindən tutmuş süni intellektdən istifadəyə, dezinformasiyaya qarşı mübarizəyə, xəbər istehsalına, hüquqi çərçivənin təkmilləşdirilməsinə və rəqəmsal platformaların inkişafına qədər bütün cəhətlərini hərtərəfli anlamaq həmişəkindən daha vacibdir.
“Ümidvaram ki, tədbir iştirakçıların gəldiyi nəticələr, onların hesabatları və iyulun 29-da dərc olunacaq yekun sənəd gələcək vizyonunun formalaşmasına, Türkiyənin potensialının və mövqeyinin güclənməsinə töhfə verəcək”, - deyə dövlət başçısı sözlərini yekunlaşdırıb.
Bölmənin digər xəbərləri
