Türkiyədə bank kartından istifadə edərək oğurluq törədən şəxs Azərbaycanda həbs edilib
Bakı, 24 noyabr, AZƏRTAC
Türkiyədə bank kartından istifadə etməklə oğurluq əməlini törətməkdə təqsirləndirilərək 2020-ci ildə azadlıqdan məhrum etmə cəzasına məhkum edilmiş, beynəlxalq axtarışda olan, Türkiyə Respublikasının vətəndaşı, 1986-cı il təvəllüdlü Mehmet Yavuz İncesu bu ilin avqustunda ölkəmizdə müəyyənləşdirilərək barəsində həbs qətimkan tədbiri seçilib.
Bu barədə Baş Prokurorluqdan AZƏRTAC-a məlumat verilib.
Bildirilib ki, məhkumun verilməsinə dair Sivas Cümhuriyyət Baş Prokurorluğunun vəsatəti Azərbaycan Respublikası Baş Prokurorluğu tərəfindən baxılması üçün Bakı Ağır Cinayətlər Məhkəməsinə göndərilib.
"Ekstradisiya haqqında" Avropa Konvensiyasına və ona Əlavə Protokollara əsasən məhkumun ekstradisiyası haqqında qərar qəbul edilərək Ədliyyə Nazirliyinin Penitensiar Xidmətinin xüsusi konvoyun müşayiəti ilə Türkiyənin səlahiyyətli orqanlarına təhvil verilib.
Bölmənin digər xəbərləri
