Türkiyədə növbəti 56 saatlıq “Evdə qal!” rejimi başlayıb
Ankara, 15 yanvar, AZƏRTAC
Türkiyədə yeni növ koronavirus (COVID-19) infeksiyası ilə mübarizə tədbirləri çərçivəsində tətbiq edilən məhdudiyyətlərə uyğun olaraq növbəti 56 saatlıq “Evdə qal!” rejimi başlayıb.
AZƏRTAC xəbər verir ki, yanvarın 15-də Ankara vaxtı ilə saat 21:00-da qüvvəyə minən bu rejim yanvarın 18-də saat 5:00-dək davam edəcək.
Qeyd edək ki, hazırda Türkiyədə “Evdə qal!” rejimi iki mərhələdə aparılır. Həftənin ilk beş günü saat 21:00-dan başlanan rejim ertəsi gün 5:00-da başa çatır. Cümə günləri eyni saatda tətbiq olunan məhdudiyyət isə 56 saat qüvvədə olur.
Yanvarın 13-dən infeksiyaya qarşı “Sinovac” vaksini ilə peyvəndləməyə start verilməsi ictimaiyyətdə COVID-19 virusu ilə mübarizənin səmərəli olacağına böyük ümidlər yaradıb.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
