Türkiyədə növbəti 56 saatlıq “Evdə qal!” rejimi başlayıb
Ankara, 29 yanvar, AZƏRTAC
Türkiyədə yeni növ koronavirus (COVID-19) infeksiyası ilə mübarizə tədbirləri çərçivəsində tətbiq edilən məhdudiyyətlərə uyğun olaraq növbəti 56 saatlıq “Evdə qal!” rejimi başlayıb.
AZƏRTAC xəbər verir ki, yanvarın 29-da Ankara vaxtı ilə saat 21:00-da qüvvəyə minən bu rejim fevralın 1-də saat 5:00-dək davam edəcək.
Qeyd edək ki, hazırda Türkiyədə “Evdə qal!” rejimi iki mərhələdə aparılır. Həftənin ilk beş günü saat 21:00-dan başlanan rejim ertəsi gün 5:00-da başa çatır. Cümə günləri eyni saatda tətbiq olunan məhdudiyyət isə 56 saat qüvvədə olur.
Hazırda Türkiyədə yeni növ koronavirus (COVID-19) infeksiyasına qarşı Çindən alınan “Sinovac” vaksini ilə kütləvi peyvəndləmə davam edir. İlk növbədə, səhiyyə işçiləri arasında kütləvi peyvəndləmə aparılıb. Hazırda vaksinləmə növbəsi yaşı 70-dən yuxarı olanlara çatıb.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
