Türkiyədə sutka ərzində koronavirusdan 127 nəfər dünyasını dəyişib
Ankara, 19 aprel, AZƏRTAC
Türkiyədə bir sutka ərzində koronavirusdan daha 127 nəfər dünyasını dəyişib. Bununla da ölkə üzrə bu virusdan ölənlərin ümumi sayı 2017 nəfərə çatıb.
AZƏRTAC xəbər verir ki, epidemiya ilə bağlı vəziyyətə dair son rəqəmlər Türkiyə Səhiyyə Nazirliyinin rəsmi saytında yer alıb.
Məlumatda bildirilir ki, aprelin 19-də ölkədə 35 min 344 nəfər üzərində test aparılıb. Onlardan 3977 nəfərdə infeksiya aşkarlanıb.
İndiyədək testdən keçirilənlərin ümumi sayı 634 min 277 nəfərə çatıb. Ümumilikdə, 86 min 306 nəfər müalicəyə cəlb olunub. Hazırda 1922 nəfər reanimasiyada, 1031 xəstə isə süni nəfəs aparatına qoşulmuş haldadır.
İndiyədək 11 min 976 nəfərin müalicəsi uğurla başa çatıb. Aprelin 19-də daha 1523 nəfər sağalaraq evə buraxılıb.
Qeyd edək ki, bu gün yerli vaxtla saat 00:00-da ölkənin 31 vilayəti üzrə tətbiq olunan növbəti ikigünlük komendant saatı başa çatır. Ümumilikdə evdən çıxmamaq məhdudiyyətinə ciddi əməl olunub. Ankara, İstanbul, İzmir, Kocaeli də daxil olmaqla 31 vilayətdə tətbiq olunan giriş-çıxış qadağasının müddəti daha 15 gün uzadılıb.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
