Türkiyədə yerli mexaniki süni tənəffüs cihazı istehsal edilib
İstanbul, 18 aprel, AZƏRTAC
Türkiyədə yerli mexaniki süni tənəffüs cihazı istehsal edilib.
AZƏRTAC xəbər verir ki, Türkiyənin Milli Müdafiə naziri Hulusi Akar Makina və Kimya Sənayesi Təşkilatı (MKEK) tərəfindən yerli və milli imkanlardan istifadə edilərək, "Səhra" adı verilən mexaniki süni tənəffüs aparatı istehsal edildiyini bildirib. Yeni cihazın dizaynı və istehsalının tamamilə türkiyəli mütəxəssislərə aid olduğunu deyən nazir bunun bir prototip olduğunu, yaxın günlərdə təkmilləşdiriləcəyini qeyd edib. Nazir, həmçinin "Səhra"nın dünyadakı oxşar cihazlardan daha ucuz başa gəldiyini və məqsədin həftədə 500 ədəd mexaniki süni tənəffüs aparatı istehsal etmək olduğunu deyib.
Türkiyənin yeni növ koronavirusla durmadan mübarizə apardığını vurğulayan H.Akar ölkənin Milli Müdafiə Nazirliyinin də bu işdə üzərinə düşən öhdəliyi yüksək səviyyədə yerinə yetirməyə çalışdığını vurğulayıb.
H.Akar nazirliyin imkanlarını inkişaf etdirərək qoruyucu tibbi ləvazimatların istehsalında əhəmiyyətli addımlar atdıqlarını da qeyd edib.
Bildirilib ki, hazırda ölkədə maska, xüsusi geyim və dezinfeksiya vasitələrinin istehsalı davam edir. Bundan əlavə ölkə başçısı Rəcəb Tayyib Ərdoğanın tapşırığına əsasən, dost və müttəfiq ölkələrə COVID-19-la mübarizə istiqamətində yardımlar edilir.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
