Türkiyəli ekspert: Dünya ictimaiyyəti Qərbi Azərbaycan haqqında həqiqətləri bilməlidir
Ankara, 23 may, AZƏRTAC
“Qərbi Azərbaycan mövzusuna və regionumuzun gerçəklərinə həsr olunmuş beynəlxalq tədbirlər Cənubi Qafqaz və Anadolu tarixinin təbliği, ermənilərin faktları saxtalaşdırmaq və dünya ictimaiyyətini çaşdırmaq cəhdlərinin qarşısının alınması baxımından çox önəmlidir”.
Bu fikirləri AZƏRTAC-a açıqlamasında Ankaranın Hacı Bayram Vəli Universitetinin dosenti Esma Özdaşlı bildirib. O, mayın 21-də Ankarada keçirilmiş “Qərbi Azərbaycana qayıdış insan hüquqlarının aliliyinin təminatıdır” mövzusunda beynəlxalq konfransdakı çıxış və təəssüratlarını bölüşüb.
Ekspert təəssüflə qeyd edib ki, dünya ictimaiyyəti hələ də Qərbi Azərbaycanın tarixi sakinlərinin taleyi barədə yetərincə məlumatlı deyil.
Ekspert misal olaraq 1915-ci il hadisələri ətrafında yaradılan qondarma “soyqırım” ajiotajını göstərib. “Tarixi uydurmalara əsaslanan antitürk isteriyasını davam etdirən ermənilər eyni zamanda bugünkü Ermənistan ərazisindəki tarixi yurdlarından yüz minlərlə azərbaycanlının zorla çıxarılmasını hər vəchlə gizlətməyə çalışırlar”, – deyə E. Özdaşlı qeyd edib və Qərbi Azərbaycan sakinlərinə qarşı qanlı cinayətlər törədildiyini xüsusi vurğulayıb.
O bildirib ki, bu gün 1915-ci il hadisələrini ‘soyqırım’ kimi təqdim edənlər özləri soyqırımı törədiblər.
“Azərbaycanlılara qarşı cinayətlər İrəvanda, Göyçədə, Zəngəzurda və digər bölgələrdə baş verib. Tarixi yaddaşı silmək məqsədilə ermənilər toponimləri dəyişib, qəbiristanlıqları və məscidləri məhv ediblər”, – deyə ekspert bildirib və əlavə edib ki, bu kimi cinayətlər Azərbaycan torpaqlarının təxminən 30 il davam edən işğalı dövründə də ermənilər tərəfindən törədilib.
O, həmçinin ermənilərin Azərbaycanın Qarabağ bölgəsində törətdikləri ekosid və ölkənin yeraltı sərvətlərinin talanması faktını da xatırladıb. “Ermənilər vicdan əzabı çəkmədən uzun illər ərzində Azərbaycanın resurslarını Fransaya və bir çox başqa ölkələrə satıblar”, – deyə Hacı Bayram Vəli Universitetinin müəllimi vurğulayıb.
Onun sözlərinə görə, bu cür cinayətlərin qarşısını almağın yolu bölgəmizin qanlı tarixi səhifələri barədə dünya ictimaiyyətini məlumatlandırmaqdan keçir.
Ekspert qeyd edib ki, Azərbaycanın haqlı mövqeyinin təbliği yolunda, o cümlədən Qərb mediası vasitəsilə yayılan dezinformasiyalar nəticəsində, dünyada ciddi informasiya maneələri formalaşdırılıb. “Biz bu vəziyyətlə 44 günlük Vətən müharibəsi dövründə də qarşılaşdıq. Ermənilərin diasporasının fəal olduğu Fransada və digər ölkələrdə Azərbaycanın tarixi qələbəsinin işıqlandırılmasına süni əngəllər yaradılırdı”, – deyə E. Özdaşlı bildirib və əlavə edib ki, erməni meylli isteriya o həddə çatmışdı ki, Fransada Azərbaycan diplomatlarının bəyanatlarını yaymaqdan belə imtina olunurdu.
O vurğulayıb ki, vəziyyətdən çıxış yolu Ankara və Bakı arasında həmrəylik şəraitində atılan birgə addımlardır. Bu addımlara Qərbi Azərbaycanda tarixi ədalətin bərpası məsələsi də daxildir. “Dünya Zəngəzur və Qərbi Azərbaycanın digər bölgələrindən olan insanların taleyini, onların doğma yurdlarını hansı şəraitdə tərk etməyə məcbur qaldıqlarını bilməlidir”, – deyə ekspert bildirib.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
