TÜRKİYƏNİN BAŞ NAZİRİ RƏCƏB TAYYİB ƏRDOĞANIN NİTQİ
-Hörmətli cümhurbaşqanlarımız!Hörmətli xanımlar və cənablar!
Dəyərli qonaqlar!
Sizləri sevgi və hörmətlə salamlayıram. Əvvəlcə, Dünya Azərbaycan və türk diaspor təşkilatları rəhbərlərinin I forumu münasibətilə qardaş Azərbaycanı bir daha ziyarət etməkdən böyük məmnuniyyət duyduğumu bildirmək istəyirəm. Bu forumun türk və azəri xalqları arasındakı qardaşlıq duyğularını yaşatmaq istiqamətində önəmli bir vəzifəni yerinə yetirdiyinə inanıram.
Azərbaycan çox qısa bir zaman içərisində önəmli addımları gerçəkləşdirmiş, böyük irəliləyişə nail olmuşdur. Bu səfərim zamanı qardaş Azərbaycanın uğurlarını bir daha müşahidə etmək fürsəti qazandım. Əlaqələrimizin səviyyəsinin, Türkiyə-Azərbaycan qardaşlığının çoxşaxəli işbirliyində əldə olunan uğurlarla dərinləşərək gücləndiyini görməkdən çox böyük məmnunluq duyuram. Türkiyə Cümhuriyyəti ilə Azərbaycan Cümhuriyyəti arasında siyasi, hərbi, iqtisadi, ticari, mədəni və digər sahələrdə örnəkverici əlaqələr mövcuddur. Arzumuz bu əlaqələri daha irəliyə aparmaqdır.
Dəyərli qonaqlar, 2005-ci il iyunun 30-da hörmətli cümhurbaşqanı İlham Əliyevlə birlikdə hazırda dayandığımız bu yerdə binanın təməlini qoyduq. Təbii ki, həmin gün mənim üçün, doğrudan da, gözlənilməz bir vəziyyət yaratdı. Çünki gördüyünüz bu ərazinin gözəl mənzərəsini pozan bir hissə var idi. O gün səfirimiz mənə dedi ki, əgər həmin hissənin bu əraziyə daxil edilməsini cənab İlham Əliyevdən xahiş etsəniz, zənnimcə Cümhurbaşqanımız bu problemi həll edəcəkdir. Mən də çox sevdiyim dəyərli qardaşıma, - çünki o, babamızın yadigarıdır, - bu vəziyyəti söylədim. O, məsul şəxsləri çağırdı. Maketin üzərində işləyirdik. Bunu işləyərkən, xəritəni götürdü, işarələdi və dedi ki, bu hissəni buraya daxil edin. Bununla da iş bitdi.
Hazırda gördüyünüz bu gözəl məkan meydana gəldi. Doğrudan da, burada çox gözəl bir memarlıq layihəsi həyata keçirildi və bu bina tikildi. İnanıram ki, bu məkan Türkiyə ilə Azərbaycan arasındakı diplomatik, siyasi əlaqələri çox fərqli şəkildə aydın gələcəyə aparacaqdır. Bu gün həm də bunun açılışını siz dostlarımızla birlikdə etmək bizə qismət olur. Buranın ümumi ərazisi 17 min 465, qapalı sahəsi 7900 kvadratmetrdir və bu göstərici ilə dünyada ən böyük səfirliyimizdən biridir. Bu, ikitərəfli əməkdaşlığımızın inkişafının da gözəl bir göstəricisidir.
Bildiyiniz kimi, bizim Azərbaycanla olan əlaqələrimiz geniş şəkildə, hər sahədə sürətlə inkişaf edir və bu, gələcəkdə də belə davam edəcəkdir. Türkiyə Cümhuriyyətinin qardaş torpaqda bayrağını dalğalandıracağı bu yeni bina, əslində, dost və qardaş Azəbaycanın illərlə arzu etdiyi ərazi bütövlüyü çərçivəsində müstəqil yaşayacağına inamımızın yeni bir ifadəsidir.
Bu gün forumda dinlədiyiniz kimi, Azərbaycanın iqtisadi və siyasi baxımdan tərəqqisini, 35 faizlik iqtisadi inkişafa nail olmaqla çox ciddi bir məsafə qət etdiyini görmək bizə xüsusi məmnunluq və sevinc verir. Ölkələrimiz arasındakı əlaqələrin inkişafında, şübhəsiz ki, səfirliklərimizin üzərinə önəmli vəzifə və məsuliyyət düşür. Bu vəzifə və məsuliyyətin yerinə yetirilməsində keyfiyyət göstəricisi mühüm yer tutur. Günümüzün şərtlərinə uyğun müasir bir binanın istifadəyə verilməsi bu baxımdan son dərəcə önəmli və sevindiricidir.
Dəyərli qonaqlar, mərhum Heydər Əliyevin ifadəsi ilə desək, bir millətin iki ayrı dövləti kimi müştərək mənfəətlərimizin artırılması üçün qarşılıqlı mədəni fəaliyyətlərin də əhəmiyyəti böyükdür. Musiqinin və gözəl sənətlərin əlaqələrimizin inkişafındakı rolu unudulmamalıdır. Səfirliyin ərazisində açıq havadakı teatrın yenidən qurularaq, istifadəyə hazır vəziyyətə gətirilməsini bu baxımdan faydalı hesab etmək olar. Səfirliyin yeni binasının daim bayramlar keçiriləcəyi yer olacağı inamı ilə, - az öncə, hörmətli səfirimizin ifadə etdiyi kimi, - Ankaradakı səfirlik binasında bayraq necə qaldırılmışdısa, indi də biz mərasimdən sonra qardaşım, çox hörmətli cümhurbaşqanı İlham Əliyev ilə birlikdə bayrağı qaldıracağıq. Bu, bizə nəsib olduğu üçün Allahıma şükür edir, sizləri hörmət və ehtiramla bir daha salamlayıram.
Bölmənin digər xəbərləri
