Türkiyənin Dokuz Eylül Universiteti və AMEA-nın təşkilatçılığı ilə beynəlxalq elmi seminar keçiriləcək
Bakı, 16 noyabr, AZƏRTAC
Noyabrın 19-da Türkiyənin Dokuz Eylül Universiteti və AMEA-nın təşkilatçılığı ilə beynəlxalq elmi seminar keçiriləcək.
Bu barədə AZƏRTAC-a AMEA-dan məlumat verilib. Bildirilib ki, 5 elm sahəsini (biologiya, kimya, fizika, riyaziyyat, kompüter elmləri) əhatə edən ikitərəfli beynəlxalq elmi seminar onlayn keçiriləcək. Tədbirdə biologiya, kimya, fizika, riyaziyyat, kompüter elmləri sahələrinin hər biri üzrə 2 məruzə AMEA-dan, 2 məruzə isə Dokuz Eylül Universitetindən olmaqla 4 məruzə dinləniləcək.
Elmi seminarın sədrləri Dokuz Eylül Universitetinin Fənn fakültəsinin dekanı professor Aylin Alın və AMEA-nın vitse-prezidenti akademik İradə Hüseynovadır. Fəxri sədrləri isə Dokuz Eylül Universitetinin rektoru professor Nüket Hotar və AMEA-nın vitse-prezidenti akademik İsa Həbibbəylidir.
Müvafiq sahə üzrə rəhbər şəxslərin və mütəxəssislərin qeydiyyatdan keçməsi və iştirakı arzuolunandır.
Seminar haqqında ətraflı məlumat AMEA-nın saytında verilib.
Bölmənin digər xəbərləri
