Türkiyənin ilk “Akkuyu” AES-inə nüvə yanacağı yüklənib
Bakı, 27 aprel, AZƏRTAC
Türkiyə və Rusiya prezidentləri Rəcəb Tayyib Ərdoğan və Vladimir Putin aprelin 27-də videokonfrans rejimində “Akkuyu” AES-in birinci enerji blokuna nüvə yanacağının yüklənməsi mərasimində iştirak ediblər.
AZƏRTAC Türkiyə KİV-lərinə istinadla xəbər verir ki, bununla “Akkuyu AES atom elektrik energetikası obyekti statusu alıb.
Türkiyənin ilk AES-i olan “Akkuyu”nun tikintisi layihəsi “Akkuuyu Nuclear” kompaniyası tərəfindən 2010-cu ilin mayında Türkiyə və Rusiya arasında imzalanmış müvafiq sazişə əsasən həyata keçirilir. Bu obyektin istifadəyə verilməsindən sonra ildə 36 milyard kilovat-saat elektrik enerjisi istehsal olunacaq. Bu, Ankara və Moskvanın ən iri birgə layihəsidir.
Rəcəb Tayyib Ərdoğan mərasimdəki çıxışında bildirib ki, Türkiyə atom elektrik enerjisi istehsal edən ölkələr sırasına qoşulmaqdan sevinc və qürur hissi keçirir. Onun sözlərinə görə, AES-ə nüvə yanacağı dəniz və hava yolu ilə çatdırılıb. “Aİ ölkələrində istehlak edilən elektrik enerjisinin 25 faizi atom elektrik stansiyaları tərəfindən istehsal olunur. Avropa Komissiyası nüvə enerjisini “Yaşıl energetika” elan etməklə bütün şübhələri aradan qaldırıb. Biz isə “Akkuyu” AES-i bu prosesin bir hissəsinə çevirdik”, -deyə Türkiyə Prezidenti vurğulayıb. O, həmçinin xatırladıb ki, bu, Türkiyə və Rusiyanın ən böyük investisiya layihəsidir və onun tikintisinə 20 milyard dollar vəsait qoyulub.
Rəcəb Tayyib Ərdoğan əlavə edib ki, AES-in bütün enerji blokları 2028-ci ildə işə salınacaq və bu obyekt ölkənin elektrik enerjisinə olan ehtiyacının 10 faizini təmin edəcək. Eyni zamanda, AES-in istifadəyə verilməsi qaz idxalına sərf edilən 1,5 milyard dollara qənaət etməyə imkan verəcək. Türkiyənin dövlət başçısı vurğulayıb ki, AES-in fevralın 6-da baş verən zəlzələdən zərər çəkməməsi inşaatçıların peşəkarlığından xəbər verir.
Vladimir Putin, öz növbəsində bildirib ki, “Akkuyu” AES iki ölkə arasında iqtisadi maraqları təmin edən layihə olmaqla yanaşı, Rusiya ilə Türkiyə arasında mehriban qonşuluq, qarşılıqlı hörmət və bir-birinin maraqlarının nəzərə alınması prinsiplərinə əsaslanan tərəfdaşlıq əlaqələrini də möhkəmləndirir. “Türkiyənin artıq nüvə sahəsinə malik olan inkişaf etmiş sənaye və texnologiya dövlətləri klubuna daxil olması çox simvolikdir. Bu, həm də respublikanın əsasının qoyulmasının 100 illik yubileyi zamanı baş verir”, -deyə Rusiya Prezidenti vurğulayıb.
Bölmənin digər xəbərləri
