RƏSMİ XRONİKA
TÜRKİYƏNİN KEÇMİŞ PREZİDENTİ SÜLEYMAN DƏMİRƏL ANKARADA AZƏRBAYCAN PREZİDENTİ HEYDƏR ƏLİYEVİ ZİYARƏT ETMİŞDİR
Türkiyənin doqquzuncu Prezidenti Süleyman Dəmirəl mayın 10-da Ankarada - Gülhanə Tibb Akademiyasında Azərbaycan Respublikasının Prezidenti Heydər Əliyevi ziyarət etmişdir.
Cənab Süleyman Dəmirəl əziz dostu və qardaşı, Azərbaycan Prezidenti Heydər Əliyevi anadan olmasının 80 illik yubileyi münasibətilə səmimi qəlbdən təbrik etdi, ona cansağlığı, uzun ömür, Azərbaycanın tərəqqisi naminə fəaliyyətində uğurlar arzuladı. O, dövlətimizin başçısının səhhətinin yaxşı olmasından, onu gümrah görməsindən çox məmnun qaldığını vurğuladı.
Prezident Heydər Əliyev onu ziyarət etdiyinə və səmimi təbrikinə görə cənab Dəmirələ təşəkkür etdi, Türkiyədə böyük diqqət, hörmət və ehtiram gördüyünü söylədi.
Azərbaycan Prezidenti Heydər Əliyev və cənab Süleyman Dəmirəl daha sonra söhbəti təklikdə davam etdirdilər.
AzərTac
Foto Rafiq Bağırovundur