DÜNYA
TÜRKSOY-UN FƏALİYYƏTİNƏ YÜKSƏK QİYMƏT
TÜRKSOY beynəlxalq təşkilatının Almatıda keçirilən 17-ci toplantısında iştirak edən türkdilli dövlətlərin mədəniyyət nazirləri yanvarın 30-da Astanaya gəlmiş, Qazaxıstan Prezidenti Nursultan Nazarbayev ilə görüşmüşlər.
Prezident Nursultan Nazarbayev ümumtürk mədəniyyətinin, tarixinin, etnoqrafiyasının tədqiqi və təbliğində, türkdilli dövlətlər arasında əlaqələrin yaranmasında TÜRKSOY-un fəaliyyətini yüksək qiymətləndirərək, bu təşkilatın işinə gələcəkdə də kömək göstərəcəyini bildirmiş və görüş iştirakçılarına xatirə medalları təqdim etmişdir.
TÜRKSOY-un baş direktoru, Azərbaycanın mədəniyyət naziri Polad Bülbüloğlu rəhbərlik etdiyi təşkilatın on illik fəaliyyəti barədə məlumat vermişdir. O, TÜRKSOY-un yaranmasında və inkişafında Qazaxıstanın xüsusi rol oynadığını vurğulamış və Prezident Nazarbayevə xatirə hədiyyəsi təqdim etmişdir.
X X X
Qazaxıstanın baş naziri İmanqali Tasmaqambetov ilə keçirilən görüşdə isə türkdilli dövlətlərin gələcəkdə də qarşılıqlı anlaşma, dostluq şəraitində yaşaması və inkişafı üçün qüvvələrin səfərbər edilməsinin vacibliyi vurğulanmışdır.
Mədəniyyətlərin qarşılıqlı təmasının millətlərin və dövlətlərin birliyinə, dostluğuna və qardaşlığına xidmət etdiyini bildirən TÜRKSOY-un baş direktoru Polad Bülbüloğlu həmkarları adından İmanqali Tasmaqambetovu baş nazir vəzifəsinə təyin olunması münasibətilə təbrik etmişdir.