“Tuti” satirik məcmuəsinin redaktoru haqqında yeni nəşr
Bakı, 23 noyabr, AZƏRTAC
AMEA Məhəmməd Füzuli adına Əlyazmalar İnstitutunun Elmi şurasının qərarı ilə Şəxsi arxivlərin tədqiqi şöbəsinin aparıcı elmi işçisi filologiya üzrə fəlsəfə doktoru Aytən Quliyevanın tərtib etdiyi “Cəfər Bünyadzadə: igid oğul və yaxud vətən məhəbbəti” kitabı işıq üzü görüb.
İnstitutdan AZƏRTAC-a bildirilib ki, kitabda Azərbaycan ədəbiyyatı və mətbuatı tarixində özünəməxsus yeri olan yazıçı-publisist, pedaqoq, uşaq ədəbiyyatı sahəsində yaradıcılıqla məşğul olan, “Tuti” satirik məcmuəsinin redaktoru Cəfər Bünyadzadənin müəllifi olduğu, əski əlifbada çap edilmiş və Əlyazmalar İnstitutunda mühafizə olunan “Mən məktəb istəyirəm”, “Dağarcıq”, “Kəşküli-nəğəm”, “Kəşkül və yaxud nəğmələr məcmuəsi” başlıqlı kitabçaları yer alıb.
A.Quliyeva tərəfindən transfoneliterasiya edilərək nəşrə hazırlanan kitab geniş oxucu kütləsi üçün nəzərdə tutulub.
Qeyd edək ki, yeni nəşrin elmi redaktoru filologiya elmləri doktoru Nailə Səmədova, rəyçiləri filologiya üzrə fəlsəfə doktoru, dosent Səbinə Əhmədova və Azərbaycan Yazıçılar Birliyi “İRS” Komissiyasının sədri, böyük elmi işçi Sona Xəyaldır.
Bölmənin digər xəbərləri
