Ultrasağçı Milli Birlik fraksiyası hökumətə qarşı etimadsızlıq təklifi verib
Paris, 24 fevral, AZƏRTAC
Fransa Milli Assambleyasında Milli Birlik fraksiyası hökumətə qarşı etimadsızlıq təklifi irəli sürüb. Partiya fərmanla qəbul edilən üçüncü Çoxillik Enerji Proqramına etiraz edir. Bu sənəd 2026–2035-ci illər üçün Fransanın enerji siyasətinin əsas istiqamətlərini müəyyənləşdirir.
AZƏRTAC xəbər verir ki, fraksiyasının rəhbəri Marin Lö Pen fevralın 12-də bu yol xəritəsinə qarşı çıxan deputatları “transpartiyalı etimadsızlıq təklifi” irəli sürməyə çağırmışdı. O, bildirirdi ki, əks halda təşəbbüsü öz fraksiyası üzərinə götürəcək. Lö Pen Çoxillik Enerji Proqramını parlamentdə müzakirə və səsverməyə çıxarılmadan fərmanla qəbul edilməsini “qırmızı xətt” adlandırmışdı.
Partiyanın yaydığı bəyanatda seçilmiş üsul tənqid edilərək, bu addım “Parlamentə qarşı illiberal akt” və hökumətin “güc tətbiqi ilə qərar qəbul etməsi” kimi qiymətləndirilib. Məzmun baxımından isə Milli Birlik strategiyanı azaldıcı adlandırır və hesab edir ki, sənəd iqlim şəraitindən asılı olaraq dəyişən külək və Günəş enerjisi kimi bərpaolunan mənbələrə üstünlük verir, nüvə enerjisinin rolunu isə zəiflədir. Partiya, həmçinin proqramın dövlət maliyyəsi üçün böyük risk yaratdığını iddia edir.
Marin Lö Pen proqramın “minimum 300 milyard avroya” başa gələcəyini iddia edib. Baş nazir Sebastyən Lökornü isə X sosial şəbəkəsində bu hesablamanı əsassız adlandırıb. Onun sözlərinə görə, 45 illik dövr üçün araşdırılan ictimai ssenarilərdən asılı olaraq nəticə ya 35 milyard avro qənaət, ya da 115 milyard avro xərc göstərir ki, bu da RN-in irəli sürdüyü rəqəmdən xeyli uzaqdır.
Bölmənin digər xəbərləri
