Ulu Öndərin uzaqgörən siyasəti nəticəsində Azərbaycan xalqı bir çox fəlakətlərdən xilas oldu
Bakı, 10 iyun, AZƏRTAC
XX əsr Azərbaycan xalqının tarixində bir çox önəmli hadisələrlə yadda qalıb. Belə ki, əsrin əvvəllərində müsəlman Şərqində ilk demokratik dövlət qurulub, yüzilliyin sonlarında isə 70 illik istilaya son qoyaraq xalqımız öz müstəqilliyinə qovuşub. Əlamətdar hadisələrlə yanaşı, ötən əsrdə bir çox şəxsiyyətlərin də adı xalqımızın tarixinə yazılıb. Azərbaycan xalqının böyük oğlu Heydər Əliyevin varlığı isə XX əsrdə dövlətimizin, xalqımızın gələcəyi üçün bir təminat oldu. Məhz Ulu Öndərin ötən əsrin 90-cı illərində həyata keçirdiyi siyasət nəticəsində Azərbaycan xalqı bir çox fəlakətlərdən, dövlətimiz isə məhv olmaqdan xilas olundu. Ötən əsrin 1970-1980-ci illərində “Qırmızı imperiya”nın hələ mövcud olmağına rəğmən, Heydər Əliyev uzaqgörən siyasətçi kimi Azərbaycanın gələcəyi üçün bir çox işlər görə bilmişdi. Odur ki, Azərbaycan xalqında ona qarşı hər zaman böyük inam var idi. 1990-cı illərdə səriştəsi olmayan bir neçə nəfərin yenicə müstəqilliyini qazanmış Azərbaycan dövlətini məhvə sürükləməsi xalqın yenidən öz dahi liderinə üz tutması çağırışları ilə müşayiət olundu. Məhz xalqın tələbi ilə Heydər Əliyev Naxçıvandan Bakıya gəldi. Heydər Əliyevin qayıdışı Azərbaycan xalqının uğursuzluqlardan və fəlakətlərdən Qurtuluşu oldu. O baxımdan da 15 iyun Azərbaycanda ən dəyərli, gözəl günlərdən biridir. Hesab edirəm ki, müasir Azərbaycanın tarixi bu gündən başlayır. Çünki Ümummilli Lider yenidən Azərbaycan rəhbərliyinə qayıtdıqdan sonra qısa müddətdə xalqın sosial iqtisadi vəziyyətinin yaxşılaşdırılması, müharibənin dayandırılması istiqamətində vacib addımlar atdı. Azərbaycan dövlətinin dayanıqlı inkişafı və gələcəyi naminə “Əsrin müqaviləsi”nin imzalanmasına nail olundu. Bu gün Azərbaycan dünyada əsas neft- qaz ixrac edən ölkələrdən biridir və Avropanın enerji təhlükəsizliyinin təmin olunmasında mühüm rol oynayır. Azərbaycanın maliyyə gəlirlərinin artmasında neft müqavilələri qarantdır. Bütün bunlar isə o dahi şəxsiyyətin uzaqgörənliyinin nəticəsi idi.
Bu sözləri AZƏRTAC-a müsahibəsində Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin (RSXM) informasiya şöbəsinin müdiri Vüsalə Rafiqqızı deyib.
V.Rafiqqızı qeyd edib: “Azərbaycanda bir çox sahələr kimi seysmologiya elminin inkişafı da məhz dahi liderin adı ilə bağlıdır. 2000-ci il noyabrın 25-də Bakıda baş verən zəlzələdən sonra Heydər Əliyevə bu sahədəki vəziyyət məruzə olundu. O zaman seysmoloqlar keçmiş sovet dönəmindən qalan avadanlıqlarla işləyirdilər və avadanlıqlar operativ məlumat xidməti yaratmağa imkan vermirdi. Ulu Öndər ən qısa müddətdə Azərbaycanda ən müasir seysmik şəbəkənin qurulması ilə bağlı göstəriş verdi. Nazirlər Kabinetinin keçirdiyi tenderin nəticəsi olaraq əvvəlcə 9 dəst, daha sonra 14 dəst peyk rabitəsi ilə işləyən seysmik stansiyalar alındı. ABŞ-ın “Kinemetrics” şirkətinin istehsalı olan bu stansiyalar peykdən idarə olunur və real vaxt rejimində işləyir. Olduqca bahalı sistemdir və demək olar ki, MDB məkanında bunun analoqu yoxdur. Yalnız bir sıra aparıcı ölkələrdə həmin sistem mövcuddur. Beləliklə 2003-cü ildən Azərbaycanda peyk rabitəsi ilə işləyən Seysmik Monitorinq Şəbəkəsi quruldu və bu gün respublika ərazisində 35 daimi, 7 mobil seysmik stansiya işləyir. Bundan başqa, 24 GPS, 6 geofiziki, 5 geokimyəvi stansiya var. Həmçinin daha 17 stansiya “Qafqaz kəsilişi” layihəsi çərçivəsində 4 rayonda yerləşdirilib. Böyük bir monitorinq sisteminin bünövrəsi Ümummilli Liderin diqqət və dəstəyi sayəsində, davamlı olaraq genişləndirilməsi isə Prezident İlham Əliyevin bu sahəni hər zaman diqqətdə saxlaması, qayğı göstərməsi nəticəsində mümkün olub.
İndi Azərbaycana çox ölkələrdən qonaqlar gəlir. Bu yaxınlarda Rusiya Elmlər Akademiyasının prezidenti, akademik Aleksandr Sergeyev RSXM-in Monitorinq Mərkəzində olarkən gördüklərini bircə kəlmə ilə “valeh oldum” kimi ifadə etmişdi. Bütün bu gözəl işlər, əldə olunan nəticələr müasir Azərbaycan dövlətinin qurucusu ulu öndərimiz Heydər Əliyevin və onun ideyalarının layiqli davamçısı İlham Əliyevin əməyinin, diqqətinin nəticəsidir.
Mən o şanslı insanlardanam ki, dahi lideri görmüşəm, tanımışam və onunla ünsiyyətdə olmuşam. Uzun illər Prezidenti müşayiət edən jurnalist qrupunun üzvü kimi Ümummilli Lideri yaxından tanımışam. Odur ki, özümü şanslı hesab edirəm”.
Bölmənin digər xəbərləri
