ÜMİD SKRİPKALARI
AZƏRTAC xəbər verir ki, İsrail dövlətinin yaradılmasının 60 illiyi münasibətilə bayram şənlikləri çərçivəsində sentyabrın 24-də Yerusəlimin Köhnə şəhər deyilən hissəsində Çar David Qülləsinin qədim divarları önündə İstanbulun məşhur simfonik orkestri İsrailin Raanana simfonik orkestri ilə birləşərək analoqu olmayan konsert vermişdir. Konsertdə həmçinin dünya şöhrətli skripkaçı Şlomo Mints iştirak etmişdir.
Konsertin unikallığı ondan ibarət idi ki, həmin konsertdə səslənən skprikalar İkinci Dünya müharibəsinin axırlarında Şərqi Avropada faşistlərdən azad edilmiş əsir düşərgələrində və gettolarda məhv olmamış alətlər idi. Bu skripkalar ölüm düşərgələrində tamamilə bərbad vəziyyətə düşmüş, onların sahibləri isə ya qəhrəmancasına həlak olmuş, ya da faşistlərin cinayətlərinin qurbanlarına çevrilmişdi.
O vaxtdan bəri ilbəil bütün dünyada toplanıb bərpa edilmiş bu alətlər 60 illik sükutdan sonra yenidən səslənmişdir. Konsert Yerusəlimin ulduzlu səması altında təşkil edilmişdi. Qədim şəhərin möhtəşəm divarları önündə musiqi sədaları və sürrealist effektlər vasitəsilə tamaşaçıların qəlbində xoş ümidlər doğuran bənzərsiz bir ab-hava yaranmışdı.
Nazirlər və İsrail parlamentinin (Knessetin) üzvləri, diplomatik korpusun və ictimaiyyətin nümayəndələri, eləcə də dünyanın müxtəlif ölkələrindən gəlmiş yüksək vəzifəli qonaqlar yəhudi xalqının kəşməkəşli tarixinin daha bir səhifəsi ilə tanış oldular.
Əlamətdar haldır ki, İstanbul simfonik orkestrinin heyətində Azərbaycandan olan skripkaçılar da çıxış edirdi. Onların bəziləri Türkiyə vətəndaşlarıdır, digərləri isə müqavilə əsasında işləyir.
######
Bölmənin digər xəbərləri
