ÜMUMDÜNYA ƏTRAF MÜHİT GÜNÜ MÜNASİBƏTİLƏ BMT BAŞ KATİBİNİN MÜRACİƏTİ YAYILMIŞDIR

03.06.2006 [22:57]
Çap et
A⁺ A^-

5 İyun – Ümumdünya ətraf mühit günü münasibətilə BMT-nin baş katibi Kofi Annanın müraciəti yayılmışdır. Müraciətdə deyilir: “Bu il qeyd edilən Ümumdünya ətraf mühit gününün “Quraq torpaqları səhralara cevirməyək” mövzusu Beynəlxalq səhralar və səhralaşma ilində planetimizdə mövcud olan quraq və yarımquraq torpaqların geniş ərazilərinə qayğı ilə yanaşmağın vacibliyini hamımıza xatırladır”.

Müraciətdə quraq rayonların Yer kürəsinin quru sahəsinin 40 faizini əhatə etdiyi və həmin rayonlarda, demək olar, 2 milyard adamın, yəni planetimizin bütün əhalisinin üçdə bir hissəsinin yaşadığı vurğulanır. Mütəxəssislərin hesablamalarına görə, indiyədək quraq torpaqların 10-20 faizi eroziyaya uğramışdır. Afrikanın Böyük Səhradan cənubda yerləşən ölkələrində, Cənubi Asiyada bu problem xüsusilə kəskin xarakter almışdır. Burada torpaqların eroziyaya uğraması ifrat yoxsulluğun və aclığın aradan qaldırılması yolunda ciddi maneədir. Quraq torpaqların aşınması və getdikcə daha cüzi ehtiyatlar uğrunda mübarizə icmalararası münaqişələrə gətirib çıxara bilər.

Kofi Annan diqqəti belə bir məsələyə yönəltmişdir ki, səhralaşma prosesini geri döndərmək son dərəcə çətindir, lakin onun qarşısını almaq mümkündür.