Ümumdünya Ticarət Təşkilatına yeni rəhbər seçilib
Cenevrə, 16 fevral, AZƏRTAC
Nigeriyalı iqtisadçı və keçmiş maliyyə naziri xanım Nqozi Okonyo-İveala Ümumdünya Ticarət Təşkilatının (ÜTT) yeni baş direktoru seçilib.
AZƏRTAC xəbər verir ki, 164 üzv ölkəni ətrafında birləşdirən beynəlxalq təşkilatın qərarı Cenevrədəki onlayn iclasında üzv ölkələrin səfirləri tərəfindən qəbul edilib. 66 yaşlı iqtisadçı vəzifə səlahiyyətlərinin icrasına martın 1-də başlayacaq.
Qeyd edilməlidir ki, N.Okonyo-İveala beynəlxalq quruma baş direktor seçilməsi ilə ÜTT tarixində ilk qadın və Afrikadan seçilən ilk rəhbər olub. Donald Tramp administrasiyası nigeriyalı iqtisadçının namizədliyinə qarşı çıxdığına görə, seçki prosesində uzun ləngimə yaranmışdı. Co Bayden prezident səlahiyyətlərinin icrasına başladıqdan sonra ABŞ-ın yaratdığı maneə aradan qalxıb.
N.Okonyo-İveala iki dəfə Nigeriyanın maliyyə naziri, sonra isə 25 il Dünya Bankından yüksək vəzifələrdə çalışıb. Onun son çalışdığı iş yeri koronavirusa qarşı peyvənd maddələrinin bütün dünyada ədalətli paylanmasına koordinasiyanı həyata keçirən Beynəlxalq Peyvənd Təşəbbüsünün (GAVİ) icra şurası olub və şuraya rəhbərlik edib.
N.Okonyo-İveala ÜTT rəhbərliyini təşkilatın ən ağır böhran içində olduğu dövrdə qəbul edir. Koronavirus pandemiyasının beynəlxalq ticarətə vurduğu ağır zərbə ilə yanaşı son illərdə ABŞ və Çin arasında gömrük cəzaları, iqtisadi maneələr təşkilatın beynəlxalq nüfuzunu aşağı salıb.
Elgün Niftəli
AZƏRTAC-ın xüsusi müxbiri
Cenevrə
Bölmənin digər xəbərləri
