ÜMUMMİLLİ LİDERİMİZ HEYDƏR ƏLİYEVİN VƏSİYYƏTİNƏ ƏMƏL OLUNUR
Baş həkim Mübariz Mustafayev bildirmişdir ki, 2003-cü ilin oktyabrında, o zaman Baş nazir vəzifəsində çalışan İlham Əliyevin iştirakı ilə istifadəyə verilmiş Mərkəz uşaq serebral iflicinin müalicəsi üçün nəzərdə tutulmuşdur və Cənubi Qafqazda yeganə belə tibb müəssisəsidir. Yaponiyanın “İtoçu” şirkəti Mərkəzi ən müasir standartlara cavab verən avadanlıqla təchiz etmişdir. Burada çalışan 94 işçinin, o cümlədən həkimlərin əksəriyyəti Yaponiyaya hazırlıq kurslarına göndərilmiş, Tokiodan gəlmiş ixtisaslı həkimlərin iştirakı ilə Azərbaycanda təşkil olunmuş kurslarda xüsusi təlimlər keçmişlər. 42 çarpayılıq stasionarda ambulator müalicəsi də aparılır.
Nazir burada müalicə olunan uşaqlarla, onların valideynləri ilə söhbət etmişdir. Valideynlər övladlarının müalicəsindən, buradakı şəraitdən razılıq etmiş, göstərilən qayğıya görə Azərbaycan dövlətinə, Prezident İlham Əliyevə, nazirliyin rəhbərliyinə minnətdarlıqlarını bildirmişlər.
Nazir uşaqları, valideynləri, Mərkəzin əməkdaşlarını qarşıdakı bayramlar münasibətilə təbrik etmişdir. O, xüsusi vurğulamışdır ki, ümummilli liderimiz Heydər Əliyevin “Uşaqlar bizim gələcəyimizdir” vəsiyyətinə dönmədən əməl olunur və əhalinin sosial müdafiəsinə qayğı bundan sonra da gücləndiriləcəkdir.
Nazirliyin əməkdaşları uşaqlara Yeni il hədiyyyələri təqdim etmişlər.
