Uzunoba Su Anbarı ətrafında bağ təsərrüfatları üçün modul tipli evlər quraşdırılır
Naxçıvan, 3 noyabr, AZƏRTAC
Muxtar respublikanın Babək rayonu ərazisində yerləşən Uzunoba Su Anbarının ətrafında 20 hektar istifadəsiz torpaq sahəsində bağ təsərrüfatları üçün modul tipli evlər quraşdırılır.
AZƏRTAC-ın Naxçıvan bürosu xəbər verir ki, şəhər və qəsəbələrdə yaşayan əhalinin istirahətinin səmərəli təşkili, yaşıllıqların artırılması, torpaqların ekoloji vəziyyətinin yaxşılaşdırılması üçün bağ təsərrüfatının yaradılması və istifadəsi məqsədilə Naxçıvan Muxtar Respublikasının Nazirlər Kabineti tərəfindən 2019-cu il dekabrın 10-da Qərar qəbul edilib. Qərara əsasən Uzunoba Su Anbarı ətrafında yerləşən 20 hektar istifadəsiz torpaq sahəsi bağ təsərrüfatı yaradılması, vətəndaşların istifadəsi üçün ayrılıb. Ayrılmış torpaq sahəsi 800 kvadratkilometr hissələrə bölünməklə 193 bağ təsərrüfatının yaradılmasına imkan verir.
Nazirlər Kabinetinin müvafiq qərarı ilə “Bağ təsərrüfatı üçün torpaq sahəsinin ayrılması və istifadəsi Qaydaları” təsdiq edilib. Bu Qaydalar torpaq sahələrinin bağ təsərrüfatlarının yaradılması məqsədilə vətəndaşlara verilməsi və istifadəsinə dair münasibətləri tənzimləyir. Bağ təsərrüfatının obyektləri bağ sahəsi və bağ sahəsi üzərində mövcud olan bina, tikili və infrastruktur vahidlərindən, subyektləri isə bağ sahəsinin dövriyyəsində iştirak edən şəxslərdən, müvafiq icra hakimiyyəti orqanlarından və bağ istifadəçilərindən ibarətdir. Qeyd edək ki, bağ evi vətəndaşların mövsümi istifadəsi, müvəqqəti qalması ilə əlaqədar məişət və digər ehtiyaclarını ödəmək üçün inşa etdiyi əsas və yardımçı tikililərdir.
Bağ ərazilərinin təşkili ərazinin təbii-iqtisadi şəraiti, həmçinin mühəndis, nəqliyyat və sosial infrastrukturu nəzərə alınmaqla əlverişli hesab edilən, dövlət mülkiyyətində olan torpaq sahələri hesabına həyata keçirilir və vətəndaşların istirahəti, öz ehtiyacları üçün kənd təsərrüfatı bitkilərinin becərilməsi məqsədilə, bağ evləri və yardımçı təsərrüfat tikililəri inşa etmək hüququ ilə onların istifadəsinə verilməsi nəzərdə tutulub. Qeyd olunan torpaqların istifadəçiləri torpaqdan təyinatı üzrə istifadə etmək, qadağan edilmiş bitkilər istisna olmaqla kənd təsərrüfatı bitkiləri becərmək və məhsul üzərində mülkiyyət hüququnu həyata keçirmək, torpaq sahəsində su ehtiyatlarından ehtiyacı üçün istifadə etmək, razılaşdırılmış layihə əsasında bağ evi və yardımçı tikililər inşa etmək, qurğular quraşdırmaq hüququna malikdirlər.
Ayrılmış torpaq sahələrində bağ təsərrüfatlarının yaradılması məqsədilə ilkin mərhələdə 30 ədəd modul tipli evin quraşdırılmasına başlanılıb və artıq 15 evdə işlər yekunlaşdırılıb. Belə ki, ərazidə 10 ədəd 2 otaqlı (47 kvadratmetr) və 5 ədəd 3 otaqlı (52 kvadratmetr) modul tipli evlər quraşdırılıb. Hər ev üçün ayrılmış torpaq sahəsi çəpərlənib və abadlaşdırılıb. Ərazidə müasir su, kanalizasiya, elektrik və yol infrastrukturu qurulub. Modul tipli evlərin detalları dünyanın yüzdən çox ölkəsində layihələr həyata keçirmiş Türkiyənin “Karmod” şirkəti tərəfindən istehsal olunub. Şirkətin məhsulları özündə son texnologiyaları, yüksəkkeyfiyyətli komponentləri birləşdirməklə yanaşı, qısa müddət ərzində böyük layihələrin həyata keçirilməsinə imkan verir.
Evlərin quraşdırılması üçün Türkiyədən mütəxəssislər dəvət olunub və onlar işləri həyata keçirən muxtar respublikanın Dövlət Şəhərsalma və Arxitektura Komitəsinin Naxçıvan Şəhər İdarəsinin işçiləri üçün təcrübə keçiblər. Bununla da işçilər artıq modul tipli evlərin qurulması işlərini tam olaraq həyata keçirirlər.
Evlərin qurulmasında istifadə olunan panellərin içi EPS materialı ilə izolyasiya olunub. Çöl divarların qalınlığı 10 santimetr, daxili divarların qalınlığı isə 6 santimetrdir. Birləşdirici elementlər olaraq qalvanizli U və H polad profillərdən istifadə edilib.
Hazırda ərazidə əlavə 15 evin də quraşdırılması üçün işlər davam etdirilməkdədir. Belə ki, evlərin beton konstruksiya işləri yekunlaşdırılıb və qısa zamanda evlərin quraşdırılması başa çatdırılacaqdır.
Bölmənin digər xəbərləri
