VAŞİNQTON PAKİSTAN ƏRAZİSİNDƏ HƏRBİ BAZALAR YERLƏŞDİRMƏK ÜÇÜN İCAZƏ ALMAĞA ÇALIŞIR
İSLAMABAD. ABŞ hərbi bazalarını yerləşdirmək üçün Pakistandan 10 il müddətinə ərazi icarəyə götürməyə çalışır. “Neyşn” qəzetinin verdiyi xəbərə görə, yanvar ayından bəri bu barədə danışıqlar aparılır. Qəzet yazır ki, ABŞ-ın dövlət katibi Kolin Pauellin İslamabada səfəri zamanı bu mövzu prezident Müşərrəflə müzakirə edilmişdir.
ABŞ-ın icarəyə götürmək istədiyi ərazi Əfqanıstanla sərhəddəki Bəlucistan əyalətində, Pasni limanı ilə Dolbəndin şəhəri arasında yerləşir. “Neyşn”in yazdığına görə, ABŞ tərəfi həmin bazalarda xidmət edəcək hərbi qulluqculara diplomatik immunitet verilməsi və ucuşlar üçün qadağan olunmuş zonalar ayrılması kimi əlavə tələblər irəli sürür.
İTAR-TASS xəbər verir ki, antitalib koalisiyası informasiya xidmətinin başçısı, ABŞ diplomatı Kenton Keyt bu mövzuda danışıqların aparılıb-aparılmaması faktını nə təsdiq, nə də təkzib etmişdir. Pakistanın informasiya məsələləri üzrə dövlət katibi Ənvər Mehmud danışıqların apaıldığı barədə məlumatları təkzib edərək bildirmişdir ki, bu məsələlər heç bir səviyyədə müzakirə olunmamışdır.
Bölmənin digər xəbərləri
