VAŞİNQTONDA 20 YANVAR FACİƏSİNƏ HƏSR OLUNMUŞ TOPLU BURAXILMIŞDIR
Azərbaycanın Vaşinqtondakı səfirliyi 20 Yanvar faciəsinin 12-ci ildönümünə həsr edilmiş toplu buraxmışdır.
“Qara Yanvar, Bakı-1990” adlanan topluya 20 Yanvar qanlı hadisələrindən dərhal sonra ABŞ-ın “Nyu-York Tayms” və “Vaşinqton Post” qəzetlərində dərc edilmiş məqalələr, həmçinin səfir Hafiz Paşayevin bu faciə ilə bağlı 2000-ci ildə Konqresdəki geniş çıxışının mətni daxil edilmişdir. Toplunun ABŞ-ın rəsmi dairələrinə, xarici ölkələrin Vaşinqtonda fəaliyyət göstərən diplomatik nümayəndəliklərinə, qeyri-hökumət təşkilatlarına və ali təhsil müəssisələrinə göndərilməsi nəzərdə tutulmuşdur.
Azərbaycanın keçməkeşli müstəqillik tarixini öyrənənlər üçün əlverişli məlumat mənbəyinə çevriləcək toplunun giriş sözündə qeyd edilmişdir ki, qərb mediasında o vaxt çap olunanlar Sovet təbliğat maşınının Azərbaycanda baş verənlər haqqında ictimaiyyəti aldatmaq cəhdlərinə tutarlı cavab idi. Müstəqilliyin yeganə seçim olduğunu bizə anladan faciəli yanvar günü hər il Azərbaycanda milli tariximizin qara günlərindən biri kimi qeyd edilir.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
