Vatikanın fransız dilli mətbuatında Azərbaycandan bəhs edən məqalə dərc olunmuşdur
Paris, 3 iyun (AZƏRTAC). Azərbaycanın Fransada və eyni zamanda Müqəddəs Taxt-Tac yanındakı səfiri Elçin Əmirbəyovun Vatikan radiosuna verdiyi müsahibəyə istinad edən “Radio Vatikan” qəzetində ölkəmizdən bəhs edən “Azərbaycan dinlərarası dialoqun aparıcı ölkəsi olmaq istəyir” sərlövhəli məqalə dərc edilmişdir.
Məqalənin əvvəlində Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın iyunun 2-də Vatikanda Roma Papası Frensislə görüşdüyü diqqətə çatdırılmışdır.
Heydər Əliyev Fondunun dəstəyi sayəsində Vatikanda Müqəddəs Pietro və aprel ayında ictimaiyyətin üzünə açılan qədim xristian abidələri arasında tarixi və memarlıq baxımından xüsusi yer tutan Müqəddəs Marçellino katakombalarının təmir edildiyi vurğulanan məqalədə hər iki tarixi abidənin bərpası ilə əlaqədar 2012-ci ildə Heydər Əliyev Fondu ilə Müqəddəs Arxeologiya üzrə Roma Komissiyası arasında razılıq sənədinin imzalandığı bildirilmişdir.
Fondun Azərbaycan xalqının ümummilli lideri Heydər Əliyevin adını daşıdığı qeyd olunan məqalədə Fond tərəfindən Azərbaycan mədəniyyətini və qiymətli mədəni dəyərlərini bütün dünyada tanıtmaq istiqamətində həyata keçirilən tədbirlərdən, o cümlədən təhsil və səhiyyə sahələrindəki layihələrdən, yeni məktəblərin, uşaq bağçalarının, sağlamlıq mərkəzlərinin tikilib istifadəyə verilməsindən ətraflı bəhs olunmuşdur.
2003-cü ildən Azərbaycana rəhbərlik edən Prezident İlham Əliyevin uğurlu daxili və xarici siyasəti, zəngin yeraltı sərvətləri neft və qaz sahələrinin istismarı sayəsində ölkə iqtisadiyyatının sürətlə inkişaf etdiyi vurğulanan məqalədə əhalisi əsasən müsəlmanlardan ibarət olan Cənubi Qafqaz bölgəsinin bu respublikasının SSRİ-nin süqutundan sonra 1991-ci ildə müstəqillik əldə etdiyi barədə oxuculara məlumat verilmiş, Roma Papası II İohan Pavelin 2002-ci ildə Azərbaycana səfər etdiyi xatırladılmışdır.
Məqalədə Roma Papasının səfəri zamanı əldə edilən razılığa əsasən, yeni kilsənin tikintisinin 2008-ci ildə başa çatdırıldığı qeyd olunmuş, müxtəlif azsaylı xalqların yaşadığı Azərbaycanda iqtisadiyyatın dünyanı bürüyən maliyyə böhranına baxmayaraq görünməmiş templə inkişaf etdiyi bildirilmişdir.
Azərbaycanın Müqəddəs Taxt-Tac yanındakı səfiri Elçin Əmirbəyovun müsahibəsində səsləndirdiyi “Azərbaycan dinlərarası dialoq üçün nümunə olan bir ölkə olmaq istəyir “fikrinə istinad edilən məqalədə İran dövləti ilə qonşu olan Azərbaycanın dünyəvi dövlət olduğu, azərbaycanlı qadınların çadra örtmədiyi, Şərq aləmində ilk dəfə 1918-ci ildə parlamentli respublika qurulan Azərbaycanda Fransadan xeyli əvvəl qadınlara səsvermə hüququnun verildiyi, amma 1920-ci ildə bolşeviklərin hakimiyyətə gəlməsi ilə demokratik dövlətin süquta uğradığı qeyd edilmişdir.
1991-ci ildə müstəqilliyini bərpa edən Azərbaycanın elə həmin dövrdən ərazisini digər ölkələrin hesabına genişləndirməyə çalışan Ermənistan ilə elan olunmamış müharibəyə cəlb olunduğu, Dağlıq Qarabağ və ona bitişik 7 rayon daxil olmaqla ərazilərimizin 20 faizinin Ermənistan tərəfindən işğal edildiyi, eyni vaxtda ölkəmizin müxtəlif quruluşlu İran, İsrail, Rusiya və Amerika Birləşmiş Ştatları kimi dövlətlərlə sağlam əlaqələr qurduğu məqalədə yer almışdır.
Azərbaycanın Şərqlə Qərb, Asiya ilə Avropa, müsəlman və xristian dünyaları arasında körpü rolunu oynadığı diqqətə çatdırılan məqalədə Vatikan kitabxanasında Qafqaza dair əlyazmaların, habelə Müqəddəs Pietro və Müqəddəs Marçellino tarixi abidələrinin bərpası ilə Azərbaycan ilə Müqəddəs Taxt-Tac arasında əməkdaşlığın başlandığı bildirilmişdir.
2002-ci ildə ll İohan Pavelin Azərbaycana səfərindən sonra XVl Benediktin dövründə 2008-ci ildə Müqəddəs Taxt-Tacın dövlət katibi, kardinal Torçizio Bertonenin, son vaxtlar isə Roma Papasının Müqəddəs Arxeologiya üzrə Şurasının sədri, kardinal Can-Franko Ravezinin səfərlərinin müqəddəs Taxt-Tac ilə ölkəmiz arasında əməkdaşlığın inkişafından xəbər verdiyi, əlaqələrin daha da inkişaf etdirilməsi üçün qarşıda mühüm vəzifələrin durduğu xüsusi qeyd olunmuşdur.
Məqalənin tam mətnini aşağıdakı linkdən oxumaq mümkündür:
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
