DÜNYA
Vatikanın Pyotr Kilsəsinin “müqəddəs qapı”sından yarım milyondan çox insan keçib
Vatikan, 7 yanvar, AZƏRTAC
Vatikanda qeyd olunan Müqəddəs Yubiley İlinin başlamasından bu vaxtadək Pyotr Kilsəsinin “müqəddəs qapı”sından yarım milyondan çox insan keçib.
AZƏRTAC xəbər verir ki, bu barədə Müqəddəs Taxt-Tacın mətbuat xidməti məlumat yayıb.
Bildirilir ki, Yubiley ilinin açılışından bəri və 2025-ci ilin ilk günlərində - təxminən iki həftə ərzində 545 min 532 nəfər kilsənin qapısından keçib. 2025-ci ili əhatə edəcək Yubiley çərçivəsində Vatikanı və Romanı 32 milyondan çox insanın ziyarət etməsi gözlənilir.
Xatırladaq ki, dekabrın 25-də Roma Katolik Kilsəsinin rəhbəri Papa Fransiskin Müqəddəs Pyotr Kilsəsinin qapısını açması ilə Yubiley İli rəsmi olaraq qeyd edilməyə başlayıb.
Müqəddəs Yubiley İli Vatikanda hər 25 ildən bir təşkil olunur. Yubiley İli tarixdə ilk dəfə 1300-cü ildə elan edilib, sonuncusu isə 2000-ci ildə Papa II İohann Pavelin dövründə olub.
Nihad Budaqov
AZƏRTAC-ın xüsusi müxbiri
Vatikan
Bölmənin digər xəbərləri
