“VERGİ UŞAQLARIN GÖZÜ İLƏ” ADLI RƏSM VƏ İNŞA MÜSABİQƏLƏRİNƏ YEKUN VURULMUŞDUR
Müsabiqənin yekunlarına həsr olunmuş tədbirdə T.İsmayılov adına Uşaq-Gənclər Yaradıcılıq Sarayının direktoru Bədayə Ramazanova çıxış edərək bu istedad yarışında iştirak edən uşaqların sayının ildən-ilə artdığını diqqətə çatdırmışdır.
Vergilər Nazirliyinin Vergi Ödəyicilərinə Xidmət İdarəsinin rəisi Elçin Məmmədov iştirakçıların sayının artmasından, ildən-ilə daha maraqlı əl işlərinin təqdim edilməsindən məmnun qaldığını bildirərək demişdir ki, belə tematik müsabiqələr uşaqların dövlətçilik anlayışlarının genişlənməsinə, büdcə və vergilər haqqında biliklərinin artmasına imkan yaradır. Biz bu işə xüsusi önəm veririk. Əvvəlki müsabiqələrdə iştirak etmiş rəsm əsərləri hazırda Vergilər Nazirliyinin inzibati binasının divarlarını bəzəyir və indiki müsabiqəyə təqdim olunmuş əl işlərindən də eyni qaydada istifadə ediləcəkdir.
Sonra əl işləri müsabiqədə qalib gələn balaca rəssamlar mükafatlandırılmışlar.
Müsabiqənin nəticələrinə görə, 5-8 yaş qrupu üzrə birinci yerə Mehdi Kərimov, ikinci yerə Marqarita Kudryatseva, üçüncü yerə Şahmirzə Quliyev layiq görülmüşlər.
9-12 yaş qrupu üzrə birinci yeri Səbinə Fətəliyeva, ikinci yeri Tural Abdullayev, üçüncü yeri Aysel Fətullayeva tutmuşlar.
13-17 yaş qrupunda birinci yer Xırdaxanım Həbibliyə, ikinci yer Aysel Tarıverdiyevaya, üçüncü yer Hüseyn Mehdiliyə verilmişdir.
Münsiflər heyəti, həmçinin asfalt üzərində çəkilən rəsmlərin qaliblərini də elan etmişdir. Bu nominasiyada birinci yerə Tural Məmmədli, ikinci yerə Mehsin Qafqazlı və Nigar Tağıyeva, üçüncü yerə Fidan Rəhimova layiq görülmüşlər.
İnşa müsabiqəsində isə birinci yeri Məhəmməd Əliyev, ikinci yeri Fidan Əliyeva, üçüncü yeri Aynur Bədəlova və Seymur Nəsibov tutmuşlar.
Vergilər Nazirliyi gənc nəslin vergi haqqında biliklərini artırmaq, gələcəyin potensial vergi ödəyicilərinə vergi mədəniyyəti aşılamaq istiqamətində tədbirləri bundan sonra da davam etdirəcəkdir.
