VERGİLƏR NAZİRLİYİ MƏTBUT XİDMƏTİNİN MƏLUMATI
Son vaxtlar bəzi hüquqi və fiziki şəxslərdən Vergilər Nazirliyinə daxil olan şikayət məktublarının araşdırılması göstərir ki, yerlərdə vergi ödəyicilərində müxtəlif xarakterli yoxlamalar aparılarkən yoxlayıcılar tərəfindən qanunvericiliyin tələblərinin pozulması hallarına yol verilir. Belə halların qarşısını almaq məqsədi ilə Vergilər Nazirliyi tərəfindən bir sıra tədbirlər həyata keçirilmişdir. Vergi ödəyicilərindən daxil olan şikayətlərin araşdırılması üçün nazirlikdə xüsusi komissiya yaradılmış, yerli vergi orqanlarında ödəyiciləri məlumatlandırma şöbələri təsis olunmuşdur. Bütün bu tədbirlər vergi mədəniyyətinin yüksəldilməsinə, vergi ödəyicilərinin hüquq və vəzifələrinin təbliğ edilməsinə xidmət etsə də, bu sahədə bəzi çatışmazlıqlar qalmaqdadır. Bu problemləri aradan qaldırmaq üçün vergi ödəyiciləri də fəal mövqe tutmalıdırlar.
Möhtərəm Prezidentimiz Heydər Əliyevin azad sahibkarlığın inkişafına qayğısının təzahür forması olan “Dövlət nəzarəti sisteminin təkmilləşdirilməsi və sahibkarlığın inkişafı sahəsində süni maneələrin aradan qaldırılması haqqında” 1999-cu ilin yanvarın 7-də verdiyi Fərmana əsasən Nazirlər Kabinetinin 1999-cu il 2 mart tarixli 31 saylı qərarı ilə mülkiyyət formasından asılı olmayaraq bütün müəssisə və təşkilatlarda “Nəzarət kitabçası”nın tətbiq edilməsi nəzərdə tutulub. “Nəzarət kitabçası”nda qeyd edilmədən aparılan bütün yoxlama və təftişlər qeyri-qanuni hesab edilir. Daxil olan şikayətlərin araşdırılması zamanı bəlli olub ki, vergi ödəyicilərinin bir çoxu “Nəzarət kitabçası”nı ümumiyyətlə əldə etmir, yaxud əhəmiyyətini başa düşməyərək ondan istifadə etmirlər. Vergilər Nazirliyi bir daha bütün müəssisə və təşkilat rəhbərlərinin nəzərinə çatdırır ki, “Nəzarət kitabçası” bütün növ yoxlamaların qanuniliyini nəzarətdə saxlamağa, daxil olan şikayətlərin əsaslığını müəyyən etməyə və iş adamlarını yoxlama aparan orqanların qeyri-qanuni hərəkətlərində müdafiə etməyə imkan verən mühüm sənəddir.
Bir daha xatırladaq ki, yoxlama və təftişlərin keçirilməsinə yalnız xidməti vəsiqəni və yoxlama barədə qərarı təqdim etməklə yanaşı, həm də “Nəzarət kitabçası”nda qeyd aparmaqla yol verilir. Vergi ödəyicilərinin qısa müddət ərzində “Nəzarət kitabçası”nı əldə etməyi zəruridir. “Nəzarət kitabçası”nı tətbiq etməklə Siz öz biznesinizə əsassız müdaxilənin qarşısının alınmasına imkan yaradırsınız.
“Nəzarət kitabçası”nın tətbiqi ilə bağlı bütün suallara yerli vergi orqanlarının məlumatlandırma şöbələrində cavab ala bilərsiniz.
Bölmənin digər xəbərləri
