“VƏTƏN SƏSİ” QƏZETİNİN 20 YAŞI TAMAM OLMUŞDUR
Bakı, 30 aprel (AZƏRTAC). “Vətən səsi” qəzetinin 20 yaşı tamam olmuşdur. Bu münasibətlə aprelin 29-da qəzetin xüsusi nömrəsi buraxılmışdır.
Xüsusi buraxılışda Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənovun qəzetin kollektivinə təbrik məktubu dərc olunmuşdur. Təbrikdə deyilir: “Dövlətqaçqınkom”un orqanı kimi fəaliyyət göstərən “Vətən səsi” qəzeti mətbuat orqanları içərisində özünəməxsus yer tutur. Çünki “Vətən səsi” fəaliyyət göstərdiyi 20 il ərzində - ölkəmizdə bəşəri problem olan qaçqın və məcburi köçkün probleminin yarandığı vaxtdan onların faciələrlə dolu taleyini, erməni təcavüzünün yaranma səbəblərini və bunun nəticəsində bir milyondan çox qaçqın və məcburi köçkünün düçar olduğu ağır həyat tərzini, eyni zamanda, Azərbaycan dövlətinin bu soydaşlarımızın sosial-məişət problemlərinin aradan qaldırılması baxımından son illərdə həyata keçirdiyi genişmiqyaslı tədbirləri, onların doğma ocaqlarına məhəbbət hissini və bu kimi məsələləri olduğu kimi işıqlandırmaqla müəyyən uğurlara nail olmuşdur”. Vurğulanır ki,
qəzetin kollektivi ötən illər ərzində dövlətçiliyimizin möhkəmləndirilməsi, Ermənistan-Azərbaycan, Dağlıq Qarabağ münaqişəsinin nizamlanması prosesində Azərbaycan dövlətinin, ümummilli lider Heydər Əliyev siyasi kursunun layiqli davamçısı Prezident İlham Əliyevin yeritdiyi uğurlu daxili və xarici siyasəti, qaçqın və məcburi köçkünlərimizin doğma ocaqlarına qayıtmaları üçün gərgin və səmərəli fəaliyyəti barədə ətraflı məlumatların nəinki bu həyatı yaşayan soydaşlarımıza, eləcə də geniş oxucu kütləsinə çatdırılması baxımından da çox iş görmüşdür.
Soydaşlarımızın qəlbindəki doğma yurda, doğma ocaqlarına qayıtmaq inamını öz səhifələrində yaşadaraq, bir milyondan çox qaçqın və məcburi köçkünün inam yerinə çevrilmiş “Vətən səsi”nin bu nömrəsində qəzetin baş redaktoru Rafiq Fərəcov qəzetin keçirdiyi 20 illik yoldan söz açaraq demişdir:
- “Vətən səsi” qəzeti qədim Oğuz torpaqlarının, ata-baba yurdlarımızın, parçalanmış Vətənimizin dərd-sərini, qaçqın və məcburi köçkün probleminin, məruz qaldığımız faciələrin tarixini əks etdirmək zərurətindən meydana gəlmişdir. Buna görə də “Vətən səsi”nin simasını Azərbaycanın taleyi özü müəyyən etmişdir. Vətənin birliyinə, suverenliyinə, demokratiyaya, haqq-ədalət uğrunda ümumxalq mübarizəsinə xidmət əzmi ilə meydana çıxan “Vətən səsi” ilk sayından narahat, tələbkar oxucularına inamla bildirmişdir ki, qaçqın və məcburi köçkünlərin haqq səsi olacaqdır, öz əməli fəaliyyətində milli demokratik mətbuatın mütərəqqi ənənələrinə sadiq qalacaqdır. Qəzetdə həm də Azərbaycanın kənd və şəhərlərinə pənah gətirmiş, qardaş və bacılarının mərhəmətinə sığınmış qaçqın və məcburi köçkünlərin həyatı, məişəti, arzu və ümidləri müntəzəm işıqlandırılır. Xüsusilə son vaxtlar dövlətimizin başçısı tərəfindən qaçqın və məcburi köçkünlərin sosial-məişət şəraitinin yaxşılaşdırılması baxımından dövlət və hökumət səviyyəsində görülən tədbirlər, soydaşlarımızın doğma ocaqlarına qaytarılması üçün apardığı gərgin işlər, atəşkəsə nail olunması, ölkə daxilində sabitliyin bərqərar edilməsi “Vətən səsi”nin əsas mövzularındandır. Qəzetin davamlı fəaliyyəti, redaksiyanın maddi-texniki bazasının möhkəmləndirilməsi, kollektivin iş şəraitinin yaxşılaşdırılması üçün təsisçi tərəfindən hərtərəfli kömək göstərilir. “Vətən səsi” bundan sonra da öz dəst-xəttinə sadiq qalacaqdır.
Xüsusi buraxılışda Milli Məclisin deputatları İmamverdi İsmayılov, Sevindik Hətəmov, Həvva Məmmədova, Aydın Mirzəzadə və Cəmil Həsənlinin təbrik məktubları dərc olunmuşdur.
Buraxılışda Azərbaycan Respublikasının insan hüquqları üzrə müvəkkili (Ombudsman) Elmira Süleymanova, Məcburi Köçkünlərin Sosial İnkişaf Fondu direktorunun müavini Dövlətxan Dövlətxanov, Nazirlər Kabinetinin mətbuat xidmətinin rəhbəri Akif Əli, akademik Budaq Budaqov, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin sədri, Şuşa Rayon İcra Hakimiyyətinin başçısı Bayram Səfərov, Azərbaycan Jurnalistlər Birliyinin sədri Elçin Şıxlı, Milli Elmlər Akademiyası Radiasiya Problemləri İnstitutunun direktoru, professor Adil Qəribov, İctimai Televiziya və Radio Yayımları Şurasının sədri Cahangir Məmmədli, “Meliorasiya və Su Təsərrüfatı” ASC-nin sədri Əhməd Əhmədzadə də qəzetin kollektivini təbrik edir, ona yeni yaradıclıq uğurları arzulayırlar.
Yubiley nömrəsinin digər materialları da oxucuların marağına səbəb olacaqdır.
Bölmənin digər xəbərləri
