“Vikipediya”nın Azərbaycan dili bölməsində məqalələrin sayı 158 mini keçib
Bakı, 20 aprel, AZƏRTAC
“Vikipediya” bu gün internet axtarış sistemində ən çox müraciət olunan virtual ensiklopediyadır. Bu nəhəng virtual ensiklopediyada 300-dən çox dil bölməsi fəaliyyət göstərir. Həmin bölmələrdən biri də Azərbaycan dilindədir. Artıq “Vikipediya”nın Azərbaycan dili bölməsində məqalələrin sayı 158 mini keçib.
Bu barədə AZƏRTAC-a AMEA-nın Mərkəzi Elmi Kitabxanasının direktor müavini Elnur Eltürk məlumat verib. O bildirib ki, doğma dilimizdə onlarca məqalə yaradılması və redaktəsi Azərbaycan dili bölməsini daha da zənginləşdirir və keyfiyyətini artırır. Məqalələrin artması, həmçinin kəmiyyət dəyişikliyinə səbəb olur. Bu, eyni zamanda, doğma dilimizdə keyfiyyətli məqalələr yaradılmasını zəruri edir. Burada Azərbaycan “Viki” icmasının əməyi danılmazdır. Birgə iş, koordinasiya olunmuş fəaliyyət bu istiqamətdə uğura aparan yoldur. Bir neçə ildir ki, Mərkəzi Elmi Kitabxanada intensiv “Vikipediya” təlimləri keçirilir. Təlimləri bitirən “Viki” könüllülər bu zəngin elmi, informativ, intellektual, virtual akademik ensiklopediyaya öz töhfələrini verirlər.
Bölmənin digər xəbərləri
