Viktor Orban: Macarıstan Aİ-yə cərimə ödəməyəcək
Budapeşt, 4 noyabr, AZƏRTAC
Macarıstan və şəxsən bu ölkənin lideri Viktor Orban hökumətin üçüncü ölkələrdən gələn miqrantlara sığınacaq verilməsi sahəsində yürütdüyü siyasətə görə uzun müddətdir ki, Avropa İttifaqının tənqid mərkəzindədir. Brüssel hesab edir ki, bu siyasət “Aİ normalarına ziddir”. Avropa Komissiyası uzun illərdir ki, Aİ-nin miqrasiya və sığınacaq verilməsi ilə bağlı qaydalarına riayət edilməsinin bütün üzv dövlətlərin ortaq vəzifəsi olduğunu israr edir, çünki problemin bir dövlətdən digərinə keçirilməsi Aİ-nin birliyini və həmrəyliyini təhdid edir (Avropa Komissiyasının rəhbəri Ursula Fon der Lyayenin münaqişənin lap əvvəlində dediyi sözlər - red.).
AZƏRTAC xəbər verir ki, bir neçə ay əvvəl, sentyabrın 13-də Macarıstan Brüsseldən 200 milyon avro məbləğində ödəmə bildirişi alıb. Bu bildirişdə hökumətin sığınacaq verilməsi ilə bağlı ümumi xəttə əməl etməkdən imtinasına görə 45 gün ərzində cərimənin ödənilməsi tələb olunur. Bu, Macarıstanın Aİ-nin onun siyasətini dəyişdirmək tələblərinə əməl etməməsindən sonra baş verib, bu da Avropa Komissiyasını cəza tədbirlərinə əl atmağa məcbur edib.
Bundan əlavə, ölkə cərimənin ödənilmədiyi hər günə görə Brüsselə 1 milyon avro borcludur. Macarıstana cərimə üzrə borclarını ödəmək üçün 45 gün, yəni oktyabrın 31-nə qədər vaxt verilmişdi. Yayın sonuna qədər 200 milyonluq baza cəriməsini nəzərə almasaq, təkcə gündəlik cərimələrdən olan borcun məbləği 93 milyon avroya çatıb.
Bu gün M1 telekanalında çıxış edən Macarıstanın Baş naziri Viktor Orban Avropa Komissiyasına Macarıstanın cərimələri ödəməkdən imtina etdiyi barədə məktub göndərdiyini açıqlayıb.
Brüssel isə hesab edir ki, Macarıstan tabe olmağa borcludur, çünki Aİ-nin məhkəmə qərarları məcburidir.
Vüqar Seyidov
AZƏRTAC-ın xüsusi müxbiri
Budapeşt
Bölmənin digər xəbərləri
