Bakı, 19 sentyabr, AZƏRTAC

Komanda Rumıniyadan döndükdən sonra məşqlərini hər gün Bakı İdman Sarayında davam etdirir. Heyətdə cəzalı və ya zədəli futzalçı yoxdur. Bu, bizim üçün müsbət məqamdır. Oyunçularla psixoloji söhbət aparmışıq. Artıq ilk oyunu unutmalı, Niderlandla matça köklənməliyik.

AZƏRTAC xəbər verir ki, bu sözləri futzal üzrə Azərbaycan milli komandasının baş məşqçisi Vitali Borisov sentyabrın 20-də DÇ-2024-ün elit-raund mərhələsində Bakıda Niderland yığmasına qarşı keçirəcəkləri oyun barədə federasiyanın rəsmi saytına danışarkən deyib.

41 yaşlı mütəxəssis Rumıniya ilə matçla müqayisədə heyətdə ciddi dəyişiklik etməyəcəyini bildirib: “Sadəcə, İsa Atayevin əvəzinə Manekanı komandaya dəvət etmişik. Bu dəyişiklik sırf məşqçilər korpusunun qərarıdır”.

Rəqib barədə fikirlərini bildirən V. Borisov onların Qazaxıstanla oyunlarını izlədiklərini vurğulayıb: “Niderland yığması da bu görüşə ciddi hazırlaşır. Təsadüfi deyil ki, sentyabrın 17-dən Bakıdadırlar. Baş məşqçiləri də tanış simadır. Migel vaxtilə millimizin məşqçisi olub, onunla həm də Rusiya klubunda oynayan zaman işbirliyimiz olub. Çətin və bizim üçün əsas oyun olacaq. Bu matçda xal itirmək olmaz. Bir növ, qrupda bizim üçün finala bərabər görüş olacaq. Azarkeşlərin dəstəyi ilə 3 xal qazanacağımıza inanıram".

Qeyd edək ki, Bakı İdman Sarayında keçiriləcək Azərbaycan–Niderland oyunu saat 18:30-da başlayacaq.