V.XRİSTENKO HESAB EDİR Kİ, MDB ÖLKƏLƏRİNİN ÇOXSAHƏLİ İQTİSADİ İNTEQRASİYASININ DİNAMİKASI BİR QƏDƏR AZALMIŞDIR
AZƏRTAC-ın xüsusi müxbiri xəbər verir ki, Rusiyanın sənaye və energetika naziri Viktor Xristenko “Qazeta SNQ” qəzetinə müsahibəsində bildirmişdir ki, ötən illər ərzində MDB-də iqtisadi münasibətlər bir qədər dəyişmişdir. Onun sözlərinə görə, ikitərəfli layihələrdə əldə olunmuş aşkar uğurlarla müqayisədə, çoxsahəli iqtisadi inteqrasiyanın sürəti bir qədər azalmışdır. Nazirin fikrincə, 12 ölkənin formatında iqtisadi inteqrasiya mürəkkəb məsələdir. V.Xristenko bildirmişdir ki, Birlik ölkələrində iqtisadi vəziyyətin daha geniş pərakəndəliyi müştərək qərarların qəbul edilməsinin sürətini azaldır, qəbul olunmuş qərarların yerinə yetirilməməsi isə inteqrasiyanın səmərəsini aşağı salır. Bununla belə, həlli yalnız MDB ölkələri çərçivəsində mümkün olan məsələlər aktual olaraq qalır. Bunlar terrorizm və cinayətkarlıqla, qanunsuz miqrasiya ilə mübarizə məsələləri, humanitar məsələlərdir. Onların həlli iqtisadi inkişaf üçün şəksiz əhəmiyyətə malikdir. İnformasiya mübadiləsi apararaq, keçmiş sovet məkanında baş verən iqtisadi proseslər barədə ümumi təsəvvür yaratmaq imkanının olması çox vacibdir. Bu, ikitərəfli əsasda səmərəli əməkdaşlığa şərait yaradır.
Bölmənin digər xəbərləri
