Vyanada qeyri-leqal miqrasiya mövzusunda konfrans keçirilir
Vyana, 23 iyul, AZƏRTAC
İyulun 22-də Vyanada 18 ölkənin Daxili İşlər nazirləri və miqrasiya üzrə səlahiyyətli nümayəndələrinin iştirakı ilə Avropaya qeyri-leqal miqrasiya mövzusuna həsr olunmuş konfrans işə başlayıb.
AZƏRTAC xəbər verir ki, ikigünlük konfransda əsas məqsəd Aralıq dənizi vasitəsilə Avropaya miqrasiya axını ilə bağlı intensiv müzakirə prosesinə start verməkdir. Avstriyanın Daxili İşlər naziri Karl Nehammer konfransda bildirib ki, 2015-ci il qaçqın böhranından sonra qeyri-leqal miqrasiya və qaçqınlar Avropa İttifaqında (Aİ) əsas mövzulardan birinə çevrilib. Dəniz yolu ilə Avropaya can atan qaçqınların xilas edilməsi, onların hansı ölkə tərəfindən qəbulu, eləcə də qaçqınların üzv ölkələr arasında kvota əsasında paylanması böyük müzakirələrə səbəb olub və Avropada sığınacaq siyasətinin islahata ehtiyacı olduğunu göstərir. Eləcə də illərdən bəri Birgə Avropa Sığınacaq Sisteminin yaradılması məsələsi hələ danışıqlar masası üzərində qalır. Nazir qeyd edib ki, konfransın məqsədi konkret qərarlar qəbul etmək olmasa da, dənizdə çətin vəziyyətə düşən qaçqınların xilası və qaçqınların paylanması mövzusunu yenidən canlandırmağa xidmət edir. Eyni zamanda, COVID-19 pandemiyası dövründə miqrasiya marşrutları üzərində yerləşən ölkələrlə etibarlı əməkdaşlığın dərinləşdirilməsi tələb olunur və bu istiqamətdə yeni təşəbbüslərə ehtiyac vardır.
Konfransda 12 Aİ ölkəsi ilə yanaşı Qərbi Balkan ölkələri (Albaniya, Bosniya və Herseqovina, Kosovo, Monteneqro, Şimali Makedoniya və Serbiya), Avropa Komissiyası, Aİ-nin Sığınacaq Məsələləri üzrə Dəstək Bürosu, Avropa sərhədlərinin mühafizəsi agentliyi (Frontex), Miqrasiya Siyasətinin İnkişaf etdirilməsi üzrə Beynəlxalq Mərkəzin təmsilçiləri iştirak ediblər.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
