MƏDƏNİYYƏT
XALQ YAZIÇISI ANAR “DİALOQ AVRASİYA” BEYNƏLXALQ TƏŞKİLATI İDARƏ HEYƏTİNİN SƏDRİ SEÇİLMİŞDİR
Yanvarın 14-də İstanbulun “Dedeman” mehmanxanasının konfrans salonunda “Dialoq Avrasiya” beynəlxalq təşkilatı idarə heyətinin ilk iclası keçirilmişdir. Doqquz nəfərdən ibarət idarə heyətinə yazıçılardan Çingiz Aytmatov (Qırğızıstan), Oljas Süleymenov (Qazaxıstan), Anar (Azərbaycan) Muxtar Şaxanov (Qazaxıstan), alimlərdən Rostislav Rıbakov \Rusiya\, Qulia Alasania \Gürcüstan\, jurnalist Boris Maryan \Moldova\, İstanbul böyük şəhər bələdiyyəsi mədəniyyət departamentinin müdiri Şenol Dəmiröz, Türkiyə Jurnalistlər və Yazıçılar Fondunun sədri Harun Tokat daxildirlər.
2001-ci ilin sentyabrında ABŞ-da törədilmiş terror hadisələrini bütün dünyada sülhə, sabitliyə, əmin-amanlığa və xalqlar arasında dialoqa qarşı amansız təxribat kimi dəyərləndirən idarə heyətinin üzvləri bu ilin payızında Türkiyədə təşkilatın “İslam terrora qarşı” mövzusunda geniş iclasının keçirilməsi təklifini irəli sürdülər.
Respublika Yazıçılar Birliyinin sədri, xalq yazıçısı, Milli Məclisin deputatı Anar iclasda çıxış edərək, islam ölkəsi kimi - Azərbaycanın on üç ildən artıq müddətdə erməni terroruna məruz qaldığını xatırlatdı və gələcək toplantının mövzusunu “İslam terrora qarşı. İslama qarşı terror” - şəklində müəyyənləşdirilməsini əsaslandırdı. Təklif yekdilliklə bəyənildi. Azərbaycan nümayəndəsinin təklifi ilə Rusiya EA Şərqşünaslıq İnstitutunun direktoru, professor Rostislav Rıbakov, Qazaxıstanın YUNESKO-dakı səfiri Oljas Süleymenov və Türkiyənin tanınmış alimi, professor İlbər Oltaylı qarşıdakı toplantının məruzəçiləri seçildilər.
İclasda “Dialoq Avrasiya” beynəlxalq təşkilatının ədəbiyyat sahəsində xüsusi mükafatının təsis edilməsi qərara alındı, münsiflər heyətinə rəhbərlik Çingiz Aytmatova tapşırıldı.
Idarə heyətinin iclasında böyük türk şairi Nazim Hikmətin 100 illiyi ilə əlaqədar Tükiyədə, Azərbaycanda, Rusiyada və digər Avrasiya ölkələrində tədbirlərin keçirilməsinin vacibliyi vurğulandı.
İclasda təşkilati məsələdə müzakirə olundu. Azərbaycanın xalq yazıcısı Anar yekdilliklə “Dialoq Avrasiya” beynəlxalq təşkilatı idarə heyətinin sədri seçildi.