XARİCİ ŞİRKƏTLƏRİN KƏND RAYONLARINA MARAĞI ARTIR
Ölkəmizdə həyata keçirilən aqrar islahatlar sayəsində kənd təsərrüfatı istehsalında əldə edilən uğurlar xarici şirkətlərin kənd rayonlarına da marağını artırmışdır.
Göyçay rayon icra hakimiyyətinin başçısı Nazim İsmayılov AZƏRTAC-ın müxbiri ilə söhbətində bildirmişdir ki, dünyada süd məhsulları istehsalı sahəsində məşhur olan İsveçrənin iş adamları rayonda yeni müəssisə yaradılması üçün on milyon dollar sərmayə qoymuşlar. Ən müasir avadanlığın köməyi ilə 27 adda yüksək keyfiyyətli süd məhsulları istehsal edəcək bu müəssisədə son işlər görülür və o, ayın axırınadək işə salınacaqdır. Onlarca adamın işlə təmin olunacağı müəssisə ətraf rayonlardan gətiriləcək süddən də istifadə edəcəkdir.
Aqrar islahatların müsbət nəticələri hər sahədə hiss olunur. Ötən il Göyçay taxılçıları 8 min 721 hektar sahədən 31 min 673 ton məhsul götürmüşlər. Bu, rayonun tarixində ən yüksək göstəricidir. Cari ildə taxıl əkinlərinin sahəsi 13 min hektardan çox olacaqdır.
Heyvandarlıq sahəsindəki nəticələr də ürəkaçandır. Məsələn, aqrar islahatların yenicə başlandığı dövrdə - 1996-cı ildə rayonda cəmi 24,6 min baş malqara var idisə, 2001-ci ildə 94 min başdan çoxdur. Daha məhsuldar cins almaq üçün Hollandiya şirkətinin köməyi ilə 1500 düyə süni yolla mayalandırılmışdır.
Şübhəsiz ki, kəndlinin öz torpağına, təsərrüfatına bağlılığı gələcəkdə daha müsbət nəticələr verəcək, kənd əhalisinin güzəranı getdikcə yaxşılaşacaqdır.
AZƏRTAC-ın “Şirvan”
Informasiya mərkəzi
Bölmənin digər xəbərləri
