Xəlil Abbasov: Qlobal yükdaşımaların 80 faizdən çoxu dəniz nəqliyyatının payına düşür
Bakı, 21 iyul, AZƏRTAC
Qlobal miqyasda yükdaşımaların 80 faizdən çoxu dəniz nəqliyyatının payına düşür. Bu göstərici dənizçilik sektorunun qlobal iqtisadiyyat üçün nə qədər böyük əhəmiyyət daşıdığını göstərir. Bu baxımdan əsas məsələlərdən biri dəniz nəqliyyatında çalışan heyətin və daşınan yüklərin təhlükəsizliyinin təmin olunmasıdır.
Bu sözləri AZƏRTAC-a məxsusi müsahibəsində Liman Sığortası və Təkrarsığorta Brokerinin direktoru Xəlil Abbasov deyib.
O qeyd edib ki, sığorta bütün dünyada bir növ təhlükəsizlik kəməri rolunu oynayır: “Təbii ki, sığorta baş verə biləcək zərərin qarşısını almır, lakin risklərin və mümkün maliyyə itkilərinin minimuma endirilməsinə kömək edir. Hər bir gəmi sığortalanarkən sığorta şirkətləri tərəfindən müxtəlif tələblər irəli sürülür. Bu tələblər həm gəmi heyətinin təhlükəsizliyi, həm də daşınan yüklərlə bağlı olur. Əsas mərhələ isə risklərin əvvəlcədən qiymətləndirilməsidir. Hər bir risk ayrıca təhlil edilir və buna uyğun təhlükəsizlik tədbirləri müəyyənləşdirilir. Əgər əvvəllər əsasən təbii fəlakətlər və texniki nasazlıqlar kimi risklər sığortalanırdısa, bu gün geosiyasi gərginliklər, müharibə riskləri və kibertəhdidlər kimi yeni risklər də xüsusi sığorta təminatına daxil edilir”, - deyə direktor vurğulayıb.
Bölmənin digər xəbərləri
