XOKKEYÇİLƏRİMİZ UKRAYNA YIĞMASINI İKİNCİ DƏFƏ MƏŞLUB ETDİ

27.03.2006 [22:20]
Çap et
A⁺ A^-

AZƏRTAC xəbər verir ki, Respublika Otüstü Xokkey Kompleksində qadın xokkeyçilər arasında beynəlxalq turnir davam edir.

Martın 27-də Azərbaycan və Ukrayna komandaları arasında keçirilən oyunun ilk hissəsində hesab açılmamışdır. Görüşün 37-ci dəqiqəsində Zeynəb Nuriyeva, 55-ci dəqiqəsində Zərifə Zeynalova, 10 dəqiqə sonra isə yenə də Zeynəb Nuriyeva rəqib qapısından üç top keçirmişlər. Yalnız qarşılaşmanın sonuncu dəqiqəsində ukraynalı xokkeyçi Natalya Vasikova komandamızın qapısından bir top keçirməyə nail olmuş və beləliklə, görüş 3:1 hesabı ilə yığmamızın xeyrinə başa çatmışdır.

Xatırladaq ki, martın 24-də keçirilmiş ilk oyun da 2:0 hesabı ilə xokkeyçilərimizin qələbəsi ilə qurtarmışdı. Hazırda turnir cədvəlində Azərbaycan komandasının 7, İtaliya xokkeyçilərinin 2, ukraynalıların isə 1 xalı var.

Turnir iki dövrədə dairəvi sistemlə keçirilir. Martın 28-də İtaliya və Ukrayna, martın 29-da isə Azərbaycan və İtaliya komandaları görüşəcəklər.