Xorvatiya hər il milyonlarla PUA istehsal edə bilər
Zaqreb, 30 sentyabr, AZƏRTAC
Xorvatiyanın müdafiə naziri İvan Anuşiç bəyan edib ki, ölkəsi yaxın illərdə FPV tipli pilotsuz uçuş aparatlarının (PUA) istehsalını milyonlarla ədəd səviyyəsinə çatdıra bilər.
Nazir bildirib ki, hazırkı imkanlarla istehsalı asanlıqla yarım milyona qədər artırmaq olar. Lakin bu işə strateji yanaşılsa, bir neçə milyon belə dron istehsal etmək çətin olmayacaq. Onun sözlərinə görə, FPV dronları yalnız kamikadze funksiyası daşımır, həm də kəşfiyyat missiyalarını yerinə yetirə bilir.
Qeyd edək ki, Xorvatiya hakimiyyəti ölkəni Avropa İttifaqında PUA istehsalında lider mövqeyə çıxarmağı hədəfləyib. ABŞ, Fransa, Hindistan və Səudiyyə Ərəbistanı artıq Xorvatiyanın “Orqa” şirkəti ilə FPV dronlarının tədarükünə dair müqavilələr imzalayıb. Bildirilir ki, bu dronların istehsalında Çin komponentlərindən istifadə olunmur, bütün detallar Avropa İttifaqı ölkələrində hazırlanır. “Orqa” məhsulları Xorvatiya ordusunun ehtiyacları üçün də alınır.
Xatırladaq ki, Xorvatiyanın xarici işlər naziri Qordan Radman sentyabrın 5-də ölkəsinin “PUA koalisiyasına” qoşulmaq niyyətində olduğunu bəyan etmişdi.
İqbal Hacıyev
AZƏRTAC-ın xüsusi müxbiri
Zaqreb
Bölmənin digər xəbərləri
