YAP MƏRKƏZİ QƏRARGAHINDA NÖVBƏTİ MƏTBUAT KONFRANSI
R.Həsənov demişdir ki, hazırda istehlak bazarında malların keyfiyyəti ilə bağlı mövcud problemlərin müəyyən qismi qanunvericilikdəki boşluqlarla əlaqədardır. Belə ki, ərzaq məhsullarının istehsalına aid xammalın tərkibinin yoxlanılması Kənd Təsərrüfatı Nazirliyinin müvafiq qurumları tərəfindən həyata keçirilir. Topdansatış mərkəzlərindəki və dükanlardakı malların keyfiyyətini yoxlamaq isə İqtisadi İnkişaf Nazirliyinin səlahiyyətlərinə daxildir. Agentlik keyfiyyət nəzarətinin vahid mərkəzdən idarə edilməsinin mahiyyətini nəzərə alaraq, qanunvericilik bazasının təkmilləşdirilməsi məqsədi ilə əlaqədar qurumlara təkliflər göndərib.
Azərbaycanda milli standarların formalaşması üçün zəruri tədbirlər görüldüyünü vurğulayan baş direktor qeyd etmişdir ki, müvafiq normalar beynəlxalq standartlara uyğunlaşdırılmalıdır. Lakin yeni yaranan müəssisələrdən birdən-birə Avropa standartlarına uyğun məhsul tələb etmək reallıqdan uzaqdır. Bu işdə mövcud reallıqlar nəzərə alınır ki, müəssisələrin istehsal gücünə mənfi təsir etməsin. Cari ilin 5 ayında 47 adda məhsula milli standart müəyyən edilmişdir. Bununla belə, şərabçılıq sənayesində, meyvə şirələrinin hazırlanmasında, balıq və balıq məhsullarının istehsalında Avropa standartlarına uyğun məhsul hazırlamaq üçün imkanlar genişdir. Nəzərə alınmalıdır ki, məhsulları beynəlxalq standartlara uyğunlaşdırmadan ixrac etmək mümkün deyil.
İstehsal məhsullarının keyfiyyətini yaxşılaşdırmaq üçün görülən tədbirlərdən danışan natiq diqqətə çatdırmışdır ki, müəssisələrdə və xidmət sahələrindəki cihaz və avadanlıqların düzgün işləməsini təmin etmək malların normaya uyğun buraxılması və xidmət işlərinin yaxşılaşdırılması üçün çox zəruridir.
Bildirilmişdir ki, cari ilin yanvar-may aylarında agentliyin müvafiq laboratoriyaları tərəfindən 16 min 632 ədəd elektirik sayğacı, 156 min 108 ədəd qaz sayğacı, 8520 ədəd su sayğacı yoxlanılaraq istismara yararlılığı təsdiqlənmişdir. Hesabat dövründə yanacaqdoldurma məntəqələrində 1644 ədəd avadanlıq plomblanmışdır. 189 istehsal müəssisəsində araşdırma aparılmış, normaya uyğun məhsul buraxılması üçün qüsurları aradan qaldırmaq məqsədi ilə 89 müəssisəyə tələblər göndərilmiş, çatışmazlıqlarla bağlı iradlar çatdırılmışdır.
R.Həsənov jurnalistləri maraqlandıran suallara cavab vermişdir.
