YAP Səbail rayon təşkilatında şəhid ailələri ilə görüş keçirilib
Bakı, 28 aprel, AZƏRTAC
YAP Səbail rayon təşkilatının qərargahında koronavirus COVID-19 pandemiyasının xüsusi karantin rejiminin tələblərinə və qaydalarına uyğun olaraq şəhid ailələrinin üzvləri ilə görüş keçirilib.
Təşkilatın mətbuat xidmətindən AZƏRTAC-a bildiriblər ki, görüşdə əvvəlcə Azərbaycanın ərazi bütövlüyü və düşmən tapdağındakı torpaqlarımızın işğaldan azad olunması uğrunda Vətən müharibəsində qəhrəmancasına döyüşərək şəhidlik zirvəsinə ucalan Vətən övladlarının əbədiyaşar əziz xatirəsi bir dəqiqəlik sükutla yad edilib.
“Şəhid ailələrinə və qazilərə qayğı” davamlı aksiyası çərçivəsində YAP Səbail rayon təşkilatı tərəfindən görülən işlər və şəhid, qazi ailələrinin daim xüsusi diqqətdə saxlanılması barədə danışan YAP Səbail rayon təşkilatının sədri professor Şəmsəddin Hacıyev bildirib ki, YAP-ın üzvləri, partiya fəalları, gənclər Səbail rayonu ərazisində yaşayan şəhid ailələrini mütəmadi ziyarət edir, onların gündəlik qayğıları ilə maraqlanır, ailələr tərəfindən qaldırılan məsələlərin həlli istiqamətində öz səlahiyyətləri çərçivəsində müvafiq işlər görürlər.
Prezident, Müzəffər Ali Baş Komandan İlham Əliyevin rəhbərliyi ilə Azərbaycan xalqının və Silahlı Qüvvələrimizin 44 günlük Vətən müharibəsində şanlı qəhrəmanlıq dastanı yazdığını vurğulayan Ş.Hacıyev qeyd edib ki, dövlətimizin başçısının “dəmir yumruğu” tarixi ədaləti bərpa etdi, 30 ilə yaxın işğal altında qalan Azərbaycan torpaqlarını düşmən tapdağından təmizlədi. Həmçinin müstəqil dövlətimizin ərazi bütövlüyü bərpa olundu. Diqqətə çatdırılıb ki, Qarabağın işğaldan azad olunmasından sonra Azərbaycanın müasir müstəqillik tarixində tamamilə yeni inkişaf dövrü başlayıb. İşğaldan azad edilmiş və mənfur düşmən tərəfindən viran qoyulmuş ərazilərdə sürətli və kompleks bərpa, quruculuq işləri aparılır, əsas infrastruktur təmin olunur, yollar, ağıllı kəndlər salınır. Keçmiş qaçqınlar və köçkünlər tezliklə dədə-baba yurdlarına qayıdacaqlar və o bölgələrin iqtisadi potensialı, yeraltı, yerüstü sərvətləri Azərbaycan iqtisadiyyatına töhfə verəcək.
Ş.Hacıyev xüsusi qeyd edib ki, Vətən müharibəsində Azərbaycanın şanlı Qarabağ Zəfərindən sonra bölgədə yeni geosiyasi və geoiqtisadi reallıqlar, regional əməkdaşlıq üçün böyük imkanlar yaranıb. Güclü iqtisadiyyata və orduya malik Azərbaycan Cənubi Qafqazda söz sahibinə, Türkiyə ilə birlikdə isə qlobal aktora çevrilib. Azərbaycanın Qələbəsini bütün dünya azərbaycanlıları, türk dünyası böyük sevinc, qürur hissi ilə qarşılayıb. Azərbaycan xalqı hərb meydanında nümayiş etdirdiyi qəhrəmanlıq, iradə və qələbə ruhu ilə türk millətinin adını yüksəldib. İki qardaş dövlət olan Azərbaycan və Türkiyə bütün dünyaya nümayiş etdirib ki, türk xalqları birləşərsə, onların qarşısında heç bir düşmən dayana bilməz.
Şəhid və qazi ailələrinə dövlət səviyyəsində göstərilən yüksək diqqət və qayğı, həyata keçirilən ardıcıl və sistemli tədbirlər, YAŞAT Fondunun təqdirəlayiq fəaliyyəti haqqında ətraflı məlumat verən Ş.Hacıyev bu istiqamətdə ictimai təşkilatların, o cümlədən Yeni Azərbaycan Partiyasının müxtəlif səpkili təşəbbüsləri və gələcək layihələrindən bəhs edib. Qeyd olunub ki, YAP Səbail rayon təşkilatı tərəfindən Vətən müharibəsi günlərində 22 sosial aksiya, şanlı Zəfər Günündən - 2020-ci il noyabrın 8-dən etibarən bu günədək şəhid ailələri ilə əlaqədar 12 sosial aksiya, qazilərlə bağlı 7 müxtəlif səpkili humanitar tədbir və aksiyalar həyata keçirilib. Bu aksiyalar çərçivəsində şəhid ailələrinə dəfələrlə maddi kömək göstərilib, ərzaq sovqatları, qurban payları, şəhid övladlarına və ailələrdə olan bütün uşaqlara hədiyyələr təqdim olunub. Eyni zamanda, Şabran və Ucar rayonlarında dəfn olunan Səbail rayon şəhidlərinin məzarları ziyarət olunub, Ucar rayonunun mərkəzi və kəndlərindəki bütün şəhid ailələrinə evlərində baş çəkilib, onlara Ramazan sovqatları və maddi kömək təqdim edilib.
Həmçinin Bakıya səfər edən qardaş Türkiyədən gələn sahibkarların və sənət adamlarının şəhid ailələrinin evlərinə ziyarətləri təşkil olunub. Müqəddəs Ramazan günlərində cəmiyyətin həssas üzvlərinin daha yüksək diqqət və qayğıya ehtiyacı olduğunu vurğulayan Ş.Hacıyev bütün rayon ictimaiyyət nümayəndələrini, ziyalıları, rəhbər şəxsləri, iş adamlarını bu istiqamətdə görülən işlərdə daha da fəal iştirak etməyə çağırıb.
Ş.Hacıyev şəhid ailələrinin dövlətimiz, cəmiyyətimiz tərəfindən daim xüsusi diqqət mərkəzində saxlanılacağını bir daha diqqətə çatdırıb.
Çıxış edən 132-134 saylı Təhsil Kompleksinin direktoru Sara Xanlarova və 6 saylı məktəb-liseyin direktoru Gülşən Orucova qeyd ediblər ki, beynəlxalq ictimaiyyət 44 günlük ağır müharibədə yalnız irəli gedən, hər gün yeni kəndlər, yaşayış məntəqələrini işğaldan azad edən, çiyinlərində yaralılarını, şəhidlərini Qələbə zirvəsinə daşıyan mərd, yenilməz Azərbaycan xalqı, qəhrəman, məğrur, başı uca şəhid anası fenomeninə şahidlik edib. Azərbaycanın şanlı Qələbə tarixini qanları ilə yazan, torpaqlarımızın azadlığı uğrunda canını qurban verən Azərbaycanın qəhrəman oğullarının qanı yerdə qalmayıb. İşğaldan azad olunan torpaqlarımızda şanlı Azərbaycan bayrağının qürurla dalğalanması bu gün hamımızın ən böyük təsəllisidir. Azərbaycan qadını 44 günlük şərəf mübarizəsində bütün dünyaya sübut edib ki, Azərbaycan anası Vətənə layiq necə igid oğullar yetişdirə bilirlər. Bu mərd, şücaətli övladlara görə bütün valideynlərə bir daha təşəkkür edilib, onlara Allahdan səbir dilənib.
Görüşdə Müqəddəs Ramazan günlərində Səbail rayonunun şəhid ailələri üçün növbəti sosial aksiya icra olunub, hər bir ailəyə Ramazan sovqatı və qurban payı təqdim edilib. Görüşdə iştirak edən şəhid övladlarına, ailələrdəki bütün uşaqlara şirniyyat, oyuncaqlar hədiyyə olunub.
Çıxış edən şəhid Murad Qurbanovun anası Mehriban Qurbanova, şəhid Əli Nağıyevin atası Mehman Nağıyev, şəhid Cavidan Ağayevin atası Mirzağa Ağayev, şəhid Cavidan İbrahimlinin qardaşı Şamxal İbrahimli və bütün şəhid ailələrinin nümayəndələri şəhidlərimizin adının əbədiləşdirilməsi üçün təkliflər səsləndiriblər.
Görüş fikir mübadiləsi və səsləndirilən təkliflərin müzakirəsi ilə davam edib. Sonra xatirə şəkilləri çəkdirilib.
Bölmənin digər xəbərləri
