Yaponiya qubernatorları əcnəbi işçiləri qəbul edən peşə sahələrinin sayını artırmağa çağırıblar
Tokio, 8 iyun, AZƏRTAC
Yaponiya Milli Qubernatorlar Assosiasiyası Ədliyyə Nazirliyinə müraciət edərək ölkənin işçi çatışmazlığı ilə əlaqədar yaşadığı problemlərin həlli üçün əcnəbi işçiləri qəbul edən peşə sahələrinin sayını artırmağa çağırıb.
AZƏRTAC yerli KİV-lərə istinadla xəbər verir ki, əcnəbi işçilərin problemləri ilə əlaqədar işçi qrupun rəhbəri, Aiçi prefekturasının qubernatoru Hideaki Omura ədliyyə naziri Takaşi Yamasita ilə görüşüb.
H.Omura nazirə deyib ki, bütün Yaponiyada kiçik və orta şirkətlər işçi çatışmazlığı problemi ilə daha çox qarşılaşır. Qubernator, eyni zamanda daha inkuliziv cəmiyyətin formalaşması üçün maliyyə vəsaitinin artırılmasını xahiş edib. Buraya əcnəbi işçilər üçün bütün sutka ərzində fəaliyyət göstərən məsləhətçi mərkəzlər daxildir.
Nazir cavabında bildirib ki, verilən təkliflər müzakirə olunacaq və xaricdən gələn işçilərin qəbulu sistemi daha da inkişaf etdiriləcək.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
