Yaponiyada tibb bacıları hökumətdən əməkhaqqına əlavə ödənilməsini xahiş edirlər
Tokio, 18 aprel, AZƏRTAC
Yaponiya Tibb Bacıları Assosiasiyası hökumətə müraciət edərək koronavirusa yoluxmuş xəstələrə xidmət zamanı riskə görə tibb bacılarının əməkhaqqına əlavə ödənilməsini xahiş edib.
AZƏRTAC Yaponiya KİV-lərinə istinadla xəbər verir ki, assosiasiya bu barədə məktubla Yaponiyanın Səhiyyə, Əmək və Sosial Təminat naziri Kato Katsunoboya müraciət edib.
Məktubda qeyd edilir ki, tibb bacıları koronavirusa yoluxan xəstələrlə həkimlərdən fərqli olaraq artıq vaxt keçirdiklərinə görə risk təhlükəsi ilə daha çox üzləşirlər.
Bundan əlavə, simptomları olmayan virus daşıyıcıları xəstəxənaya gəldiyi zaman xəstəxanadaxili yoluxma imkanı daha da artmış olur. Bu zaman səhiyyə işçilərinin və digər insanların onlardan yoluxması imkanının artması daha böyük narahatçılıq yaradır.
Eyni zamanda, koronavirusa yoluxan xəstələrə qulluq edən tibb bacıları cəmiyyət tərəfindən də diskriminasiyaya məruz qalırlar. Belə ki, onlar işdən sonra evlərinə geri dönərkən taksi sürücüləri onlara xidmətdən imtina edirlər. Məktəbəqədər müəssisələr isə onların uşaqlarını qəbul etmək istəmirlər.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
