Yaponiyalı döyüşçü: Azərbaycandakı bütün idmançılara rəğbətim böyükdür
Bakı, 2 noyabr, AZƏRTAC
"Məşqlərimi tamamlamışam. Döyüşə tam hazıram".
AZƏRTAC xəbər verir ki, bu sözləri Azərbaycanın MMA idmançısı Tofiq Musayevin yaponiyalı rəqibi Koji Takeda “Rizin” Döyüş Federasiyasının Bakıda keçiriləcək “Landmark 7” turniri ilə bağlı təşkil olunmuş mətbuat konfransında deyib.
O, rəqibi Tofiq Musayevin peşəkar döyüşçü olduğunu bildirib: "Təcrübəsinə görə onun şansının daha çox olduğunu düşünürəm. Əlbəttə ki, mənim də şanslarım var. Musayev sürətli şəkildə döyüş aparır. Sürətdə rəqibə uduzmamağa çalışacağam. Mənim öz döyüş üslubum var. Bütün fikrimi bu yarışa kökləmişəm. Rinqdə öz gücümü göstərəcəyəm".
Həmişə öz ölkəsində döyüşdüyünü vurğulayan idmançı qeyd edib ki, bu dəfə Bakıda döyüşmək daha fərqli hiss etdirir: "Fikirləşmək lazımdır ki, azərbaycanlı döyüşçülər bu vaxta kimi Yaponiyaya yarışmaq üçün gəliblər. Bu dəfə isə mən onların ölkəsinə gəlmişəm. Bu ölkənin bütün idmançılarına rəğbətim böyükdür. Onların çəkdiyi əziyyəti indi mən çəkirəm. Bu, mənim üçün yaxşı təcrübə olacaq".
Qeyd edək ki, turnir noyabrın 4-ü start götürəcək.
Bölmənin digər xəbərləri
