Yaponiyanın hakim partiyasında sədr seçkilərində kimin şansı daha yüksəkdir?
Tokio, 2 sentyabr, AZƏRTAC
Sentyabrın 2-də Yaponiyanın hakim Liberal Demokratik Partiyası (LDP) Baş Nazir Şinzo Abenin xələfini müəyyənləşdirmək üçün sədr seçkilərini sentyabrın 14-də keçirmək barədə qərar qəbul edib.
AZƏRTAC xəbər verir ki, namizədlər arasında LDP-dən olan deputatların təqribən 70 faizinin dəstəklədiyi Yoşihide Suqanın şansı daha çoxdur.
Bildirilir ki, LDP-nin lideri vəzifəsi uğrunda rəsmi kampaniyaya sentyabrın 8-də start veriləcək. Bu seçkilərin qalibi parlamentin sentyabrın 16-da keçiriləcək növbədənkənar iclasında Baş Nazir vəzifəsinə təsdiq olunacaq.
LDP-nin yeni lideri Şinzo Abenin partiyaya sədrliyinin 2021-ci ilin sentyabrınadək davam edəcək dövrünə qədər fəaliyyət göstərəcək.
Təqribən son səkkiz ildə Baş Nazir Şinzo Abe ilə birlikdə Nazirlər Kabinetinin tərkibində fəaliyyət göstərmiş 71 yaşlı Yoşihide Suqanın bu gün keçiriləcək mətbuat konfransı zamanı öz namizədliyini irəli sürəcəyi gözlənilir.
LDP-nin sədri vəzifəsi uğrunda mübarizəyə keçmiş Xarici İşlər naziri Fumio Kişida və Müdafiə naziri Şiqeru İşiba da qoşulublar. Onların hər ikisi namizədliklərini sentyabrın 1-də irəli sürüblər.
Bütün ölkə üzrə təqribən 1 milyon 800 min üzvü olan hakim LDP Yaponiyada mövcud şəraiti nəzərə alaraq sədr seçkilərini sadələşdirilmiş prosedurda keçirməyi qərara alıb. Bu isə o deməkdir ki, LDP sədrini 394 deputat və yerli şöbələrdən olan 141 nümayəndə seçəcək.
LDP-nin Nizamnaməsinə görə, adi halda sədr seçkilərində son iki ildə partiyaya illik 4 min yen üzvlük haqqı ödəmiş hər bir nümayəndə iştirak etmək hüququna malikdir. Lakin bu dəfə ölkədə koronavirus pandemiyası ilə əlaqədar vəziyyətə görə partiya rəhbərliyi Ş.Abenin istefasının əlavə problemlər yaratmaması üçün onun sürətli həllinin zəruriliyini nəzərə alaraq sadələşdirilmiş yolu seçib.
Mütəxəssislərin rəyinə görə, partiyanın tam səsvermədən imtina etməsi, LDP-də Ş.Abenin əsas rəqibi hesab olunan Ş.İşibanın şanslarını azaldıb. Son ictimai rəy sorğularına əsasən, 63 yaşlı siyasətçi LDP-nin sıravi üzvləri tərəfindən daha çox dəstəklənsə də, qanunvericilər arasında böyük nüfuza malik deyil.
Bunun partiyadaxili fraksiyalar tərəfindən dəstəklənən Y.Suqa üçün daha əlverişli variant olduğu bildirilir.
Kyodo agentliyinin keçirdiyi son rəy sorğusunun nəticələrinə görə, respondentlərin 34,3 faizinin səsini toplayan Ş.İşiba Baş Nazir vəzifəsini tutmaq üçün daha real namizəd hesab edilir. Onun ardınca 14,3 faiz səs toplamış Y.Suqa, 13,6 faiz səslə Müdafiə naziri Taro Kono, 10,1 faiz səslə Ətraf Mühit naziri Şinziro Koizumi və 7,5 faiz səslə F.Kişida gəlir.
T.Kono və Ş.Koizumi namizədliklərini irəli sürməyəcəklərini bəyan ediblər.
Bununla yanaşı, partiya daxilində 98 üzvlə ən böyük fraksiya hesab edilən Hiroyuki Hosoda və Maliyyə naziri Taro Asonun 54 üzvə malik fraksiyası Y.Suqanın namizədliyini dəstəkləyəcəklərini bildiriblər.
Eyni zamanda, hazırda LDP-nin baş katibi vəzifəsini tutan Toşihiro Nikainin 47 nəfərdən ibarət fraksiyası, 54 üzvə malik keçmiş Bərpa naziri Vataru Takeşitanın və 11 üzvü olan sabiq Dövlət Torpaqları naziri Hobuteru İşiharanın fraksiyaları da Y.Suqanın namizədliyini dəstəkləyəcəklərini bəyan ediblər.
Qeyd edək ki, 63 yaşlı F.Kişidanın rəhbərlik etdiyi fraksiyada 47, Ş.İşibanın fraksiyasında isə cəmi 11 üzv var.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
