Yaponiyanın “Sərhədləri aşanlar 3.0” “YouTube” kanalında Azərbaycan haqqında növbəti veriliş yayımlanıb VİDEO
Tokio, 21 yanvar, AZƏRTAC
Yaponiyanın “Sərhədləri aşanlar 3.0” “YouTube” kanalında Azərbaycan haqqında növbəti veriliş yayımlanıb.
AZƏRTAC-ın xüsusi müxbiri xəbər verir ki, verilişin aparıcısı Kazuyasu İşida Ermənistan-Azərbaycan Dağlıq Qarabağ münaqişəsinin tarixi barədə məlumat verib. Bildirib ki, bu münaqişənin kökündə Ermənistanın Azərbaycana qarşı əsassız torpaq iddiası dayanırdı. Ötən əsrin 90-cı illərində ermənilərin xarici havadarlarının dəstəyi ilə Azərbaycan torpaqlarını işğal etməsinə keçən il sentyabrın axırlarında başlamış İkinci Qarabağ müharibəsi nəticəsində son qoyulub. Noyabrın 10-da Azərbaycan, Rusiya və Ermənistan liderlərinin imzaladıqları üçtərəfli Bəyanata əsasən münaqişəyə son qoyulub.
Azərbaycan, Rusiya və Ermənistan liderlərinin yanvarın 11-də Moskvada keçirilmiş görüşünü AZƏRTAC-ın xəbərləri əsasında şərh edən K.İşida bildirib ki, Azərbaycan Prezidenti İlham Əliyev və Ermənistanın baş naziri Nikol Paşinyanın Rusiya Prezidenti Vladimir Putinin vasitəçiliyi ilə keçirilən görüşü 2020-ci il noyabrın 10-da imzalanmış birgə Bəyanatın davamı idi. Üçtərəfli görüş bütün iqtisadi və nəqliyyat əlaqələrinin bərpasına, bölgədəki infrastruktur layihələrinin inkişafına əsaslanan növbəti sənədin imzalanması ilə başa çatıb. Dörd bənddən ibarət yeni sənəddə Azərbaycan, Ermənistan və Rusiya Baş nazir müavinlərinin həmsədrliyi ilə işçi qrupun yaradıldığı elan olunub. Sənəddə prioritet olaraq dəmir yolu və avtomobil əlaqəsinin yaradılması, Azərbaycan və Ermənistan ərazisindən beynəlxalq daşımaların, yük tranzitinin təmin edilməsi də əksini tapıb.
Bərpa işlərinin və yeni nəqliyyat infrastrukturunun yaradılması ilə əlaqədar layihələrin həyata keçirilməsi üçün Yaponiya şirkətlərinin də iştirakına ehtiyacın yarandığını qeyd edən K.İşida onları bu işdə fəal iştiraka dəvət edib. Bildirib ki, Azərbaycan həmişə Yaponiyaya dost münasibət bəsləyib. Əsası Azərbaycan xalqının ümummilli lideri Heydər Əliyev tərəfindən qoyulan bu əməkdaşlıq əlaqələri Prezident İlham Əliyevin hakimiyyəti dövründə də daim diqqətdə saxlanılıb. Yalnız Azərbaycanın deyil, ümumilikdə Qafqazın Yaponiya üçün əhəmiyyətini vurğulayan K.İşida hazırda bu regionda investisiyalara böyük ehtiyacın yarandığını bildirib.
Ötən illər ərzində Azərbaycana dəfələrlə səfər etdiyini xatırladan K.İşida ölkəmizin cəlbedici ərazilərə və zəngin təbii sərvətlərə malik olduğunu bildirib. Qeyd edib ki, Azərbaycan rəhbərliyi bütün dost ölkələri bu bərpa və quruculuq işlərində iştirak etmək üçün ölkəyə dəvət edib və həmin işə qoşulan bütün şirkətlərə əlverişli imkanlar yaradılacağını bəyan edib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
