YENİ MÜƏSSİSƏ AZƏRBAYCANDA VƏ XƏZƏR DƏNİZİ HÖVZƏSİNDƏ FƏALİYYƏT GÖSTƏRƏN ŞİRKƏTLƏRİN MARAQ DAİRƏSİNDƏDİR
AZƏRTAC-ın müxbiri xəbər verir ki, Azərbaycan Prezidenti İlham Əliyev avqustun 23-də Hacıqabul rayonuna səfərindən sonra Qaradağ rayonunun Ələt qəsəbəsinə gəlmişdir. Dövlətimizin başçısı burada “3A” Məhdud Məsuliyyətli Cəmiyyətinə məxsus təhlükəsizlik sədləri və qalvanikləşdirmə zavodu ilə tanış olmuşdur.
Prezident İlham Əliyev və xanımı Mehriban Əliyeva ulu öndər Heydər Əliyevin zavodun həyətində ucaldılmış büstünün önünə gül dəstələri qoydular.
Dövlətimizin başçısını və xanımını müəssisənin kollektivi yüksək ehtiramla qarşıladılar.
Azərbaycan Prezidenti müəssisədə istehsal olunan məhsullara baxdı. Məlumat verildi ki, Məhdud Məsuliyyətli Cəmiyyət respublikamızda reflektiv yol nişanlarının və informativ lövhələrin istehsalına, reflektiv yol xətlərinin çəkilməsi işlərinə 2004-cü ildən başlamış və bu işi uğurla davam etdirir. Yol hərəkətində böyük əhəmiyyət kəsb edən təhlükəsizlik sədləri isə ölkəmizə xaricdən alınıb gətirilirdi.
Zavodun inşasına 2005-ci ildə başlanmış və 2006-cı ilin sonunda yekunlaşdırılmışdır. Ümumi dəyəri 3,5 milyon manat olan zavod 2 sexdən ibarətdir. Qalvanikləşdirmə və təhlükəsizlik sədləri sexlərinin ümumi sahəsi 756 kvadratmetrdir. Sexlərdə İsveçdən alınıb gətirilmiş avadanlıq quraşdırılmışdır. Zavod il ərzində 120 kilometrdən artıq təhlükəsizlik səddi istehsal etmək gücünə malikdir. Təhlükəsizlik sədlərinin uzunmüddətli istifadəsini təmin etmək məqsədi ilə korroziyadan qorunmaq üçün xüsusi sink örtüyü ilə üzlənməsi qalvanikləşdirmə sexində həyata keçirilir. Bu sex nəinki təhlükəsizlik sədləri üçün, ümumiyyətlə, Azərbaycanın neft, energetika və tikinti sektoru üçün mühüm əhəmiyyət kəsb etməkdədir. Regionda analoqu olmayan üsulla qalvanikləşdirmə başda neft şirkətləri olmaqla, Azərbaycanda və Xəzər dənizi hövzəsində fəaliyyət göstərən şirkətlərin maraq dairəsindədir.
Bildirildi ki, qalvanikləşdirmə sexinin avadanlığı Türkiyədən gətirilmişdir. Sexin fəaliyyəti beynəlxalq standartlara uyğun qurulmuşdur. Ekoloji təmizliyə və işçilərin təhlükəsizliyinə xüsusi diqqət yetirilir.
Qalvanikləşdirmə sexində yalnız sınaq xarakterli məhsullar hazırlanmasına baxmayaraq, artıq Azərbaycanın aparıcı neft şirkətlərindən, Qazaxıstan müəssisələrindən sifarişlər daxil olmağa başlamışdır.
Prezident İlham Əliyev zavodun istehsal prosesi ilə maraqlandı, təhlükəsizlik sədləri və qalvanikləşdirmə sexlərini gəzdi.
Məlumat verildi ki, müəssisədə 62 nəfər daimi işlə təmin olunmuşdur. Quraşdırma işlərini nəzərə alsaq, bu zavodun açılışı ilə 130-dan çox işçi daimi işlə təmin olunacaqdır. Qalvanikləşdirmə sexinin gündəlik istehsal həcmi 30-40 ton təşkil edir. Mövcud standartlara uyğun olaraq metal konstruksiyasının üz qatı 80-120 mikron qalınlığında sink təbəqəsi ilə örtülür və bu da açıq hava şəraitində həmin məhsulların 35-40 il korroziyaya uğramasının qarşısını alır.
Bölmənin digər xəbərləri
