YENİ QƏRARGAH VƏ ƏSGƏR YATAQXANASI İSTİFADƏYƏ VERİLMİŞDİR
Binanın birinci mərtəbəsində hərbi hissənin qərargahı, digər 3 mərtəbədə isə əsgər yataqxanası yerləşir. Daxili İşlər Nazirliyi təmir-tikinti idarəsinin inşa etdiyi binada şəxsi heyət üçün müasir standartlara uyğun şərait yaradılmışdır.
Hərbi hissənin komandiri, polkovinik Rəşadət Nəbiyev Azərbaycan Prezidenti, Silahlı Qüvvələrin Ali Baş Komandanı İlham Əliyevin daxili qoşunlara göstərdiyi diqqət və qayğı nəticəsində son dövrdə qoşunların hərbi hissələrində quruculuq işlərinin geniş vüsət aldığını, şəxsi heyət üçün müasir standartlara cavab verən xidmət və məişət şəraitinin yaradıldığını xüsusi vurğulamışdır. O, hərbi hissələrdə inşa olunan yeni əsgər yataqxanalarının və digər obyektlərin istismara verilməsinin ənənəyə çevrildiyini söyləmiş, yeni bina barədə məlumat vermiş, obyektin tikintisində çalışanlara minnətdarlığını bildirmişdir.
Daxili işlər naziri, general-polkovnik Ramil Usubov çıxışında demişdir ki, bu gün bütün sahələrdə, o cümlədən ordu quruculuğunda qazanılan nailiyyətlərin təməli məhz böyük öndər, ümummilli liderimiz Heydər Əliyev tərəfindən qoyulmuşdur. Bu gün ölkəmiz Prezident İlham Əliyevin rəhbərliyi altında dinamik inkişaf edir. Məhz bu inkişafın nəticəsidir ki, hərbi qulluqçularımızın sosial məişət şəraiti ildən-ilə daha da yaxşılaşır, hərbi hissələr müasir standartlara uyğun yenidən qurulur, onların maddi-texniki bazası möhkəmləndirilir.
Nazir qoşunların hərtərəfli inkişafı istiqamətində görülən tədbirlər barədə söhbətini davam etdirərək, yeni qərargah və əsgər yataqxanası binasının açılışı münasibətilə şəxsi heyəti təbrik etmiş, şərəfli xidmətlərində uğurlar arzulamışdır.
Mərasimdə hərbi hissənin bir qrup şəxsi heyətinin “Hərbi xidmətdə fərqlənməyə görə” III dərəcəli medalı ilə təltif olunması barədə daxili işlər nazirinin müvafiq əmri elan edilmişdir. General-polkovnik Ramil Usubov təltif olunan hərbi qulluqçulara medalları təqdim edərək, onlara ən xoş arzularını çatdırmışdır.
İştirakçılar binanın tikinti prosesini əks etdirən fotostendə baxmış, açılışı bildirən rəmzi lent kəsilmiş, yeni binanın otaqları ilə tanış olmuş, görülən işləri müsbət qiymətləndirmişlər.
Daxili işlər naziri hərbi şəhərciyin ərazisində xidməti atların və itlərin yetişdirilməsi məntəqələrinin işi ilə tanış olmuş, süvarilərin təlim nümayişinə baxmışdır.
