“YEVLAX-TƏMİR” AÇIQ TİPLİ SƏHMDAR CƏMİYYƏTİ İLƏ TANIŞLIQ
Prezident İlham Əliyevə məlumat verildi ki, bu cəmiyyət keçmiş traktor təmiri zavodunun bazası əsasında yaradılmışdır. Əvvəllər tamamilə dağıdılmış bu müəssisədə 1993-cü ildən sonra müəyyən işlər görülmüşdü, son aylar ərzində isə buradakı sexlər tamamilə yenidən qurulmuşdur. Hazırda burada köhnə və sıradan çıxmış kənd təsərrüfatı texnikası təmir edilərək yararlı hala gətirilir. Müəssisədə 90 nəfər işçi çalışır və onların aylıq əmək haqları 500 min manata qədərdir.
Müəssisənin işçiləri yaradılmış şəraitə və ümumiyyətlə, Yevlaxda yeni iş yerlərinin yaradılmasına görə Prezident İlham Əliyevə dərin təşəkkürlərini bildirdilər. Müəssisənin direktoru Nizami Mirzəyev dövlətimizin başçısına məlumat verərək dedi ki, hazırda Volqoqrad traktor zavodunun müəssisədə yığma sexinin açılması barədə danışıqlar aparılır.
Prezident İlham Əliyev ayrı-ayrı sexləri gəzdi və yaradılmış şəraitdən razılığını bildirdi. O, habelə burada iş yerlərinin artırılması ilə əlaqədar zəruri tövsiyə və tapşırıqlarını da verdi. Dövlətimizin başçısı müəssisədə yığılmış traktorun sükanı arxasında da əyləşdi.
Azərbaycan Prezidenti müəssisənin girəcəyində yaradılmış və ümummilli liderimiz Heydər Əliyevin fəaliyyətini, rayonun iqtisadiyyatının inkişafı üçün onun gördüyü işləri əks etdirən fotoguşə ilə də tanış oldu.
Bölmənin digər xəbərləri
