ELM VƏ TƏHSİL
“Yüksəliş” qalibi: Müsabiqənin heç bir mərhələsinə əvvəlcədən hazırlaşmamışam
Bakı, 22 fevral, AZƏRTAC
AZƏRTAC “Yüksəliş” müsabiqəsinin qaliblərinin həyat yolunu təqdim etməyə davam edir.
Budəfəki müsahibimiz üçüncü “Yüksəliş” müsabiqəsinin qalibi Ülviyyə Mehralıyeva Dövlət Neft Fondunun İnvestisiya departamentinin Daşınmaz əmlak şöbəsində treyder vəzifəsində çalışır. O, 1988-ci ildə Ağdam rayonunda anadan olub. Birinci Qarabağ müharibəsi zamanı 3 yaşı olarkən ailəsi ilə Bakıya köçməli olub. Yasamal rayonu 53 nömrəli məktəbdə alıb. Azərbaycan Respublikası Prezidenti yanında Dövlət İdarəçilik Akademiyasına qəbul olub. Qəbul imtahanlarında topladığı yüksək bala görə Prezident təqaüdünə layiq görülüb. Magistratura təhsilini isə ADA Universitetində beynəlxalq münasibətlər və diplomatiya ixtisası üzrə alıb. 11 illik professional iş təcrübəsinə malik Ülviyyə Mehralıyeva dünyanın dörd bir yanına səyahət edib.
“Bu, “Yüksəliş” müsabiqəsində ilk cəhdim idi”
Müsahibimiz “Yüksəliş” müsabiqəsi başlandığı ildən müsabiqə ilə bağlı məlumatlı olsa da, üçüncü müsabiqədə şansını sınamağı qərara alıb.
“Həyat yoldaşım elə ilk ildən müsabiqəyə qoşulmuşdu. Mənim iştirakım üçün isə münasib zaman üçüncü Yüksəliş müsabiqəsi oldu. Bu, mənim “Yüksəliş” müsabiqəsində ilk cəhdim idi. Həm həyat yoldaşım, həm də yaxın dostlarım məni müsabiqədə iştiraka həvəsləndirdilər. İkinci bir tərəfdən, müsabiqə mənim illərlə qazandığım bilik və bacarıqlarımı sınamaq imkanı, yeni tanışlıqlar, unudulmaz təcrübə və qalib gəldiyim halda əvəzolunmaz imkanlar təklif edirdi. Düşünürəm ki, bütün bu amillər mənim müsabiqədə iştirakımı şərtləndirib”, - deyə Ülviyyə Mehralıyeva qeyd edib.
“Həyatımda buna bənzər bir imtahan verməmişdim”
Ülviyyə Mehralıyevanın fikrincə, müsabiqə müddətində ən maraqlı mərhələlər yarımfinal və finaldır.
“Sözügedən mərhələlərdə iştirakçılar müxtəlif komandalarda oynayaraq çoxsaylı keysləri həll etməyə çalşırlar. Qiymətləndiricilər isə müsabiqənin səkkiz meyarı üzrə iştirakçıları qiymətləndirirdi. Bu meyarlar strateji düşünmə, effektivliyin idarə olunması, nəticəyönümlülük, komanda işi, kommunikasiya bacarıqları, dəyişikliklərin və innovasiyaların idarə olunması, sosial məsuliyyət, liderlikdir. Yarımfinal və final mərhələləri həyəcanlı və bir çox hallarda gərgin keçirdi. Bu da öz növbəsində çoxlu enerji və qətiyyət tələb edirdi. Xüsusilə final mərhələsi məndə həm emosional, həm də təcrübə baxımından əvəzolunmaz bir iz buraxıb.
“Yüksəliş” müsabiqəsinin hər bir mərhələsi çətindir. Bu həm sualların çətinlik səviyyəsi, həm də iştirakçıların kifayət qədər güclü olması ilə əlaqədardır. Sözsüz ki, müsabiqənin kuliminasiyası final mərhələsidir. Xatırlayıram ki, bu mərhələdə, xüsusilə mentor keysində çox həyəcanlı idim. Ancaq mənə ən çətin gələn mərhələ “İdarəetmə bacarıqları” imtahanı olub. Həyatımda buna bənzər bir imtahan verməmişdim. Düşünürəm ki, bütün mərhələlərdə mənə yüksək konsentrasiya qabiliyyətim, güclü xarakterim və qətiyyətim kömək edib. Yarımfinal və final mərhələlərində isə insanlarla ünsiyyət və kommunikasiya, həmçinin hadisələri düzgün dəyərləndirmə qabiliyyətim məni digər iştirakçılardan fərqləndirən xüsusiyyətlər olub”, - deyə müsahibimiz əlavə edib.
“İdarəetmə bacarıqlarımı müəyyən səviyyədə inkişaf etdirdiyimi düşünürəm”
“Yüksəliş müsabiqəsi mənim həyat albomumun ən parlaq səhifələrindən biridir. Müsabiqə boyu keçirdiyim hisslər, yaşadığım təcrübələr və əldə etdiyim yeni tanışlıqlar mənim üçün əvəzolunmazdır. Öz bilik və bacarıqlarıma yenidən nəzər salmaqla, idarəçilik sahəsində özümü sınamaqla müsabiqə mənim üçün bir növ özünüqiymətləndirmə imkanı idi. Komandalarda müxtəlif keyslər üzrə işləyərkən əyani şəkildə münaqişə hallarının idarə edilməsi, stres altında çevik qərarvermə və dəyişikliklərin idarə olunması kimi bacarıqların idarəçi bir şəxs üçün necə vacib bir xüsusiyyət olduğunu daha aydın anlayırsan. Düşünürəm ki, mən bu sahələrdə uğurlu nəticələr göstərdim və bu da müsabiqənin mənə aşıladığı ən vacib dəyərlərdən biri olub.
Çalışdığım maliyyə idarəetməsi – daşınmaz əmlak investisiyaları sahəsində lazımi qədər təcrübə topladığımı və idarəetmə bacarıqlarımı müəyyən səviyyədə inkişaf etdirdiyimi düşünürəm. Hazırda Dövlət Neft Fondunun əməkdaşı kimi səlahiyyətlərim çərçivəsində dövlətimiz üçün maksimum faydalı olmağa səy göstərirəm. İşimdə hər hansı dəyişiklik haqqında danışmaq isə, düşünürəm ki, hələ tezdir.
“Yüksəliş” müsabiqəsinin heç bir mərhələsinə əvvəlcədən hazırlaşmamışam. Xüsusilə final və yarımfinal mərhələləri o qədər yaxşı təşkil edilib ki, orda hər hansı süni bir hərəkət qiymətləndiricilər tərəfindən asanlıqla fərqləndirilirdi. Ona görə mən potensial iştirakçılara müsabiqə boyu qətiyyətli və pozitiv olmağı, təbii və peşəkar oyun göstərmələrini tövsiyə edərdim”, - deyə Ülviyyə Mehralıyeva fikrini yekunlaşdırıb.
Xatırladaq ki, “Yüksəliş” müsabiqəsi Azərbaycan Prezidentinin 2019-cu il 26 iyul tarixli Sərəncamına əsasən təsis olunub. Müsabiqənin məqsədi 21-51 yaş aralığında intellektual səviyyəsi və ikiillik idarəçilik təcrübəsi olan perspektivli rəhbər şəxslərin müəyyənləşdirilməsini, dəstəklənməsini və ölkədə kadr ehtiyatı bankının yaradılmasını təmin etməkdir.
“Yüksəliş” müsabiqəsinin qalibini bir il ərzində idarəçi rəhbərlərdən – böyük şirkətlərin top-menecerlərindən və dövlət orqanlarının rəhbərlərindən fərdi karyera məsləhətləri almaq imkanı və 20 min manat dəyərində pul mükafatı gözləyir.
Növbəti - dördüncü “Yüksəliş” müsabiqəsinin keçirilməsi ilə bağlı Azərbaycan Prezidenti tərəfindən 2023-cü il dekabrın 25-də Sərəncam imzalanıb.